subuk hoti hawa se tez chalna chahti hun

subuk hotī havā se tez chalnā chāhtī huuñ

maiñ ik jalte diye ke saath jalnā chāhtī huuñ

ġhubār-e-be-yaqīnī ne mujhe rokā huā hai

zamīñ se phuuT kar bāhar nikalnā chāhtī huuñ

maiñ ḳhud sahmī huī huuñ aa.ine ke TūTne se

bahut āhista sat.h-e-dil pe chalnā chāhtī huuñ

numūd-e-sub.h se pahle kā lamha dekhne ko

añdherī raat ke paikar meñ Dhalnā chāhtī huuñ

maiñ shahr-e-shab ko āñkhoñ kī duā dene se pahle

dar-o-dīvār kā chehra badalnā chāhtī huuñ

kisī ke ḳhvāb kī takmīl meñ patthar huī thī

ab apne ḳhvāb kī lau se pighalnā chāhtī huuñ

subuk hoti hawa se tez chalna chahti hun

main ek jalte diye ke sath jalna chahti hun

ghubar-e-be-yaqini ne mujhe roka hua hai

zamin se phuT kar bahar nikalna chahti hun

main KHud sahmi hui hun aaine ke TuTne se

bahut aahista sath-e-dil pe chalna chahti hun

numud-e-subh se pahle ka lamha dekhne ko

andheri raat ke paikar mein Dhalna chahti hun

main shahr-e-shab ko aankhon ki dua dene se pahle

dar-o-diwar ka chehra badalna chahti hun

kisi ke KHwab ki takmil mein patthar hui thi

ab apne KHwab ki lau se pighalna chahti hun