subu hai aur shisha hai na koi jam hai saqi

subū hai aur shīsha hai na koī jaam hai saaqī

zabāñ par rind-mashrab kī ḳhudā kā naam hai saaqī

shikāyat gardish-e-daurāñ kī karte bhī to kyā karte

ajal hī jab ilāj-e-gardish-e-ayyām hai saaqī

kahāñ vo fikr-o-fan kā mai-kada ābād thā jin se

na 'ġhālib' hai na 'saudā' hai na vo 'ḳhayyām' hai saaqī

kashākash se ġham-o-ālām kī ab mil ga.ī fursat

tirī zulfoñ ke saa.e meñ baḌā ārām hai saaqī

qafas meñ hausla parvāz kā dam toḌ detā hai

na ḳhatra bād-o-bārāñ kā na ḳhauf-e-dām hai saaqī

ġham-o-andoh kī shiddat meñ poshīda masarrat hai

masarrat ek aks-e-shiddat-e-ālām hai saaqī

maiñ vo āzād huuñ jo bāda-e-irfāñ kā tishna hai

pilā de ok se merā piyāla ḳhaam hai saaqī

subu hai aur shisha hai na koi jam hai saqi

zaban par rind-mashrab ki KHuda ka nam hai saqi

shikayat gardish-e-dauran ki karte bhi to kya karte

ajal hi jab ilaj-e-gardish-e-ayyam hai saqi

kahan wo fikr-o-fan ka mai-kada aabaad tha jin se

na 'ghaalib' hai na 'sauda' hai na wo 'KHayyam' hai saqi

kashakash se gham-o-alam ki ab mil gai fursat

teri zulfon ke sae mein baDa aaram hai saqi

qafas mein hausla parwaz ka dam toD deta hai

na KHatra baad-o-baran ka na KHauf-e-dam hai saqi

gham-o-andoh ki shiddat mein poshida masarrat hai

masarrat ek aks-e-shiddat-e-alam hai saqi

main wo aazad hun jo baada-e-irfan ka tishna hai

pila de ok se mera piyala KHam hai saqi