subu se kaam hai botal se kaam jam se kaam

subū se kaam hai botal se kaam jaam se kaam

vo rind ham haiñ ki rakhte haiñ apne kaam se kaam

na leñ vo bande se ḳhidmat na leñ ġhulām se kaam

ki bandagī se ġharaz hai mujhe salām se kaam

kiyā hai qat-e-ta.alluq to kyoñ bulāte ho

tumheñ ġharaz tumheñ matlab tumheñ ġhulām se kaam

hamāre phuul pas-e-qatl ġhair ko denā

tumheñ to naam se matlab hai dhūm-dhām se kaam

tamām din hameñ dil kī tasalliyoñ se ġharaz

tamām shab hameñ nāloñ kī rok-thām se kaam

kisī kā naaz se kahnā vo yaad hai shab-e-vasl

koī jiye ki mare un ko apne kaam se kaam

adā-e-ḳhās se matlab tumhāre ġhamze ko

tumhāre ḳhanjar-e-abrū ko qatl-e-ām se kaam

natīja-e-kashish-e-yār naza.a-e-jāñ niklā

tamām ho hī gayā jazb-e-nā-tamām se kaam

banāv meñ ruḳh-o-gesū ke rahte ho shab-o-roz

vo kaam sub.h se tum ko ye tum ko shaam se kaam

nikālo ghar se na banda banā ke 'rāsiḳh' ko

paḌegā ek na ik din isī ġhulām se kaam

subu se kaam hai botal se kaam jam se kaam

wo rind hum hain ki rakhte hain apne kaam se kaam

na len wo bande se KHidmat na len ghulam se kaam

ki bandagi se gharaz hai mujhe salam se kaam

kiya hai qat-e-talluq to kyon bulate ho

tumhein gharaz tumhein matlab tumhein ghulam se kaam

hamare phul pas-e-qatl ghair ko dena

tumhein to nam se matlab hai dhum-dham se kaam

tamam din hamein dil ki tasalliyon se gharaz

tamam shab hamein nalon ki rok-tham se kaam

kisi ka naz se kahna wo yaad hai shab-e-wasl

koi jiye ki mare un ko apne kaam se kaam

ada-e-KHas se matlab tumhaare ghamze ko

tumhaare KHanjar-e-abru ko qatl-e-am se kaam

natija-e-kashish-e-yar naza-e-jaan nikla

tamam ho hi gaya jazb-e-na-tamam se kaam

banaw mein ruKH-o-gesu ke rahte ho shab-o-roz

wo kaam subh se tum ko ye tum ko sham se kaam

nikalo ghar se na banda bana ke 'rasiKH' ko

paDega ek na ek din isi ghulam se kaam