subut-e-ishtiyaq-e-ham-rahi lao to aao

subūt-e-ishtiyāq-e-ham-rahī laao to aao

hisār-e-zāt se bāhar nikal paao to aao

zamānoñ se faqat lahreñ gumānoñ kī gino ho

kisī din tum ye dariyā paar kar jaao to aao

had-e-ḳhvāhish meñ jiinā hai to jaao raah apnī

na dasht-e-shauq kī vus.at se ghabrāo to aao

ajab be-iḳhtiyārāna thī har aamad tumhārī

isī mauj-e-mohabbat meñ kabhī aao to aao

ye durveshoñ kī duniyā hai karishme is ke dekho

jahāñ se hī nahīñ ḳhud se bhī uktāo to aao

rifāqat ahl-e-ġham kī ik nashāt-e-muḳhtalif hai

jo rakhte ho jigar meñ dard kā ghaao to aao

hameñ is hikmat-e-daurāñ kā ik nukta bahut hai

agar dhun hai ulaT deñ vaqt ke daao to aao

subut-e-ishtiyaq-e-ham-rahi lao to aao

hisar-e-zat se bahar nikal pao to aao

zamanon se faqat lahren gumanon ki gino ho

kisi din tum ye dariya par kar jao to aao

had-e-KHwahish mein jina hai to jao rah apni

na dasht-e-shauq ki wusat se ghabrao to aao

ajab be-iKHtiyarana thi har aamad tumhaari

isi mauj-e-mohabbat mein kabhi aao to aao

ye durweshon ki duniya hai karishme is ke dekho

jahan se hi nahin KHud se bhi uktao to aao

rifaqat ahl-e-gham ki ek nashat-e-muKHtalif hai

jo rakhte ho jigar mein dard ka ghao to aao

hamein is hikmat-e-dauran ka ek nukta bahut hai

agar dhun hai ulaT den waqt ke dao to aao