suKHan-asar mausam ka khula manzar banana hai

suḳhan-āsār mausam kā khulā manzar banānā hai

mujhe sahrā kināre phuul sā manzar banānā hai

safīr-e-sub.h ā.inda huuñ saarī raat jāgūñgā

parindoñ kī tarah ik dil-kushā manzar banānā hai

lahū mausam meñ gholūñgā hunar paikar-tarāshī kā

ki patthar meñ chhupī tasvīr kā manzar banānā hai

mujhe bāb-e-asar bhī kholnā hai āsmānoñ meñ

zamīnoñ ke duā-ghar meñ duā manzar banānā hai

yahī ḳhvāhish hai mere sabz-poshoñ ke qabīle kī

mujhe phir is zamīñ ko karbalā-manzar banānā hai

mire virse meñ to sahrā hī likkhā hai magar mujh ko

madīne kī khajūroñ se sajā manzar banānā hai

yaqīnan phir tavāf-e-zāt kā manzar banā.ūñgā

magar pahle mujhe sajdoñ bharā manzar banānā hai

koī dekhe to is lā-manzarī kī dhund se aage

koī soche to is ke baad kyā manzar banānā hai

fasīl-e-qasr-e-kohna ke muqābil dhuup kā manzar

sunahrī dhuup kā mujh ko nayā manzar banānā hai

nayā rang-e-suḳhan ījād karnā hai mujhe 'shaukat'

ġhazal ke shahr meñ ik ḳhushnumā manzar banānā hai

suKHan-asar mausam ka khula manzar banana hai

mujhe sahra kinare phul sa manzar banana hai

safir-e-subh aainda hun sari raat jagunga

parindon ki tarah ek dil-kusha manzar banana hai

lahu mausam mein gholunga hunar paikar-tarashi ka

ki patthar mein chhupi taswir ka manzar banana hai

mujhe bab-e-asar bhi kholna hai aasmanon mein

zaminon ke dua-ghar mein dua manzar banana hai

yahi KHwahish hai mere sabz-poshon ke qabile ki

mujhe phir is zamin ko karbala-manzar banana hai

mere wirse mein to sahra hi likkha hai magar mujh ko

madine ki khajuron se saja manzar banana hai

yaqinan phir tawaf-e-zat ka manzar banaunga

magar pahle mujhe sajdon bhara manzar banana hai

koi dekhe to is la-manzari ki dhund se aage

koi soche to is ke baad kya manzar banana hai

fasil-e-qasr-e-kohna ke muqabil dhup ka manzar

sunahri dhup ka mujh ko naya manzar banana hai

naya rang-e-suKHan ijad karna hai mujhe 'shaukat'

ghazal ke shahr mein ek KHushnuma manzar banana hai