suKHan mein kaamrani kar raha hun

suḳhan meñ kāmrānī kar rahā huuñ

za.īfī meñ javānī kar rahā huuñ

ġhurūr-e-naqsh-e-avval pesh kyā jaa.e

maiñ kār-e-naqsh-e-sānī kar rahā huuñ

na samjhegā koī mujh ko payambar

abas dāvā-e-sānī kar rahā huuñ

ajal tū hī subuk kar mujh ko aa kar

diloñ par maiñ girānī kar rahā huuñ

dil-e-ma.ashūq patthar hai to hove

maiñ is ko paanī paanī kar rahā huuñ

tasavvur hai kahāñ mujh paas terā

maiñ ḳhud bāteñ zabānī kar rahā huuñ

nahīñ paas us ke baiThā be-sabab maiñ

guloñ kī pāsbānī kar rahā huuñ

kabhī tū bhī to mere ḳhvāb meñ aa

maiñ terī yaad jaanī kar rahā huuñ

farishte kā guzar us tak nahīñ hai

maiñ aaphī bad-gumānī kar rahā huuñ

nahīñ ai 'mus.hafī' fahmīda koī

abas jādū-bayānī kar rahā huuñ

suKHan mein kaamrani kar raha hun

zaifi mein jawani kar raha hun

ghurur-e-naqsh-e-awwal pesh kya jae

main kar-e-naqsh-e-sani kar raha hun

na samjhega koi mujh ko payambar

abas dawa-e-sani kar raha hun

ajal tu hi subuk kar mujh ko aa kar

dilon par main girani kar raha hun

dil-e-mashuq patthar hai to howe

main is ko pani pani kar raha hun

tasawwur hai kahan mujh pas tera

main KHud baaten zabani kar raha hun

nahin pas us ke baiTha be-sabab main

gulon ki pasbani kar raha hun

kabhi tu bhi to mere KHwab mein aa

main teri yaad jaani kar raha hun

farishte ka guzar us tak nahin hai

main aaphi bad-gumani kar raha hun

nahin ai 'mushafi' fahmida koi

abas jadu-bayani kar raha hun