sukhon ki aas hai kab se magar nahin aate

sukhoñ kī aas hai kab se magar nahīñ aate

maiñ vo daraḳht huuñ jis par samar nahīñ aate

na jaane kaun sī kashtī nigal gayā dariyā

ki us ke baa'd se is meñ bhañvar nahīñ aate

ye kaise barf ke hujre meñ bas gayā huuñ maiñ

kisī kī dhuup ke TukḌe idhar nahīñ aate

tire ḳhayāl kī kaisī hai rahguzar jis meñ

pahāḌ aate haiñ lekin shajar nahīñ aate

kahāñ haiñ kaun sī duniyā meñ gum haiñ vo bachche

ki jin ko yaad kabhī apne ghar nahīñ aate

ye kaise dair-o-haram haiñ ki jin kī chhat par ab

mohabbatoñ ke parinde nazar nahīñ aate

tujhī ko kaaT ke be-shakl kar ga.e 'sāhil'

vagarna dard ke dhāre kidhar nahīñ aate

sukhon ki aas hai kab se magar nahin aate

main wo daraKHt hun jis par samar nahin aate

na jaane kaun si kashti nigal gaya dariya

ki us ke ba'd se is mein bhanwar nahin aate

ye kaise barf ke hujre mein bas gaya hun main

kisi ki dhup ke TukDe idhar nahin aate

tere KHayal ki kaisi hai rahguzar jis mein

pahaD aate hain lekin shajar nahin aate

kahan hain kaun si duniya mein gum hain wo bachche

ki jin ko yaad kabhi apne ghar nahin aate

ye kaise dair-o-haram hain ki jin ki chhat par ab

mohabbaton ke parinde nazar nahin aate

tujhi ko kaT ke be-shakl kar gae 'sahil'

wagarna dard ke dhaare kidhar nahin aate