sukhon mein chahe dukhon mein meri hayat rahe

sukhoñ meñ chāhe dukhoñ meñ mirī hayāt rahe

hai aarzū mire hāthoñ meñ terā haath rahe

tumhārā pyaar jo merā charāġh-e-rāh bane

to koī fikr nahīñ din rahe ki raat rahe

anā kī baat agar hai to koī hal DhūñDo

tumhārī zid bhī ho puurī mirī bhī baat rahe

nadī ke jaise kināre kabhī nahīñ milte

yūñhī kuchh apne muqaddar ke kāġhzāt rahe

rah-e-hayāt meñ kyūñkar na pesh pesh mile

vo shaḳhs jis pe tirī chashm-e-iltifāt rahe

maiñ un se tark-e-ta'alluq bhalā karūñ kaise

jo log ranj-o-musībat meñ mere saath rahe

tirī talāsh meñ tujh ko to pā sake na magar

tamām 'umr asīr-e-tahayyurāt rahe

diyā ik aisā jalāo ujāle meñ jis ke

na qaid-e-maz.hab-o-millat na zāt-pāt rahe

ḳhushī na ġham se alag hai na ġham ḳhushī se alag

mirī hayāt ke 'gulshan' ye tajrabāt rahe

sukhon mein chahe dukhon mein meri hayat rahe

hai aarzu mere hathon mein tera hath rahe

tumhaara pyar jo mera charagh-e-rah bane

to koi fikr nahin din rahe ki raat rahe

ana ki baat agar hai to koi hal DhunDo

tumhaari zid bhi ho puri meri bhi baat rahe

nadi ke jaise kinare kabhi nahin milte

yunhi kuchh apne muqaddar ke kaghzat rahe

rah-e-hayat mein kyunkar na pesh pesh mile

wo shaKHs jis pe teri chashm-e-iltifat rahe

main un se tark-e-ta'alluq bhala karun kaise

jo log ranj-o-musibat mein mere sath rahe

teri talash mein tujh ko to pa sake na magar

tamam 'umr asir-e-tahayyuraat rahe

diya ek aisa jalao ujale mein jis ke

na qaid-e-mazhab-o-millat na zat-pat rahe

KHushi na gham se alag hai na gham KHushi se alag

meri hayat ke 'gulshan' ye tajrabaat rahe