sukun agar hai to bas lutf intizar mein hai

sukūñ agar hai to bas lutf intizār meñ hai

ki bebasī to ba-har-hāl iḳhtiyār meñ hai

ye ḳhauf bhī hai ki ashkoñ meñ Dhal na jaa.e kahīñ

vo ek aah jo naġhme kī intizār meñ hai

thakā diyā hai ḳhud apnī talāsh ne mujh ko

ki merā asl mire jhuuT ke hisār meñ hai

vo dushmanoñ kā ho lashkar ki dostoñ kā hujūm

ye raaz hai jo abhī parda-e-ġhubār meñ hai

sadā-e-rañg kī naġhmagarī se khul na sakā

vo ek qufl jo ab tak lab-e-bahār meñ hai

sukun agar hai to bas lutf intizar mein hai

ki bebasi to ba-har-haal iKHtiyar mein hai

ye KHauf bhi hai ki ashkon mein Dhal na jae kahin

wo ek aah jo naghme ki intizar mein hai

thaka diya hai KHud apni talash ne mujh ko

ki mera asl mere jhuT ke hisar mein hai

wo dushmanon ka ho lashkar ki doston ka hujum

ye raaz hai jo abhi parda-e-ghubar mein hai

sada-e-rang ki naghmagari se khul na saka

wo ek qufl jo ab tak lab-e-bahaar mein hai