sukun-e-dil ki talab mein jo be-qarar nahin

sukūn-e-dil kī talab meñ jo be-qarār nahīñ

vo apne dard-e-mohabbat se sharmsār nahīñ

ḳhushī se kaun uThātā hai ġham zamāne meñ

ye jabr vo hai ki jis par kuchh iḳhtiyār nahīñ

sab apnī zaat kī jānib haiñ aaj garm-e-safar

koī kisī ke liye mahv-e-intizār nahīñ

kuchh is tarah tirī chashm-e-karam ne luuTā hai

mujhe ḳhud apnī tabāhī kā e'tibār nahīñ

nazar-fareb bahāroñ se khelne vaale

tirī nazar meñ abhī hāsil-e-bahār nahīñ

har ek ġham kā mudāvā hai ḳhud-farāmoshī

vo hoshiyār bahut hai jo hoshiyār nahīñ

jalāo 'badr' shab-e-ġham charāġh ashkoñ ke

ki in chamakte sitāroñ kā e'tibār nahīñ

sukun-e-dil ki talab mein jo be-qarar nahin

wo apne dard-e-mohabbat se sharmsar nahin

KHushi se kaun uThata hai gham zamane mein

ye jabr wo hai ki jis par kuchh iKHtiyar nahin

sab apni zat ki jaanib hain aaj garm-e-safar

koi kisi ke liye mahw-e-intizar nahin

kuchh is tarah teri chashm-e-karam ne luTa hai

mujhe KHud apni tabahi ka e'tibar nahin

nazar-fareb bahaaron se khelne wale

teri nazar mein abhi hasil-e-bahaar nahin

har ek gham ka mudawa hai KHud-faramoshi

wo hoshiyar bahut hai jo hoshiyar nahin

jalao 'badr' shab-e-gham charagh ashkon ke

ki in chamakte sitaron ka e'tibar nahin