sukun-e-zat waqf-e-intishaar kar liya gaya

sukūn-e-zāt vaqf-e-intishār kar liyā gayā

ġhazab huā ki dil kā e'tibār kar liyā gayā

qadam qadam mile jo aable rah-e-hayāt meñ

to āñsuoñ ko misl-e-ābshār kar liyā gayā

umīd-e-sub.h-o-shām ġham ke darmiyāñ basar jo kī

to sā.atoñ ko dard meñ shumār kar liyā gayā

milā fareb-o-makr se bhī kab vo hiila jo magar

libās sādgī kā dāġh-dār kar liyā gayā

nakīr ne madad baḌī hisāb rakh ke kī mirī

gunah tamām umr be-shumār kar liyā gayā

zabān-o-jism-o-jān-o-dil gavāh sab jo ban ga.e

to jurm un se ho ke darkinār kar liyā gayā

gavāh adliya subūt hāshiyoñ pe aa ga.e

hikāyatoñ pe aise e'tibār kar liyā gayā

zabān-e-hāl muntaḳhab huī bayān-e-dard ko

vajūd aap apnā tār-tār kar liyā gayā

garāñ zamīn-e-kisht-e-ġham-e-jigar ko naqd kī adā

masarratoñ kā vahm thā udhār kar liyā gayā

jo ek jaam 'farhat'-e-hayāt kī umiid thā

sitam ye hai ki vo bhī kal pukār kar liyā gayā

sukun-e-zat waqf-e-intishaar kar liya gaya

ghazab hua ki dil ka e'tibar kar liya gaya

qadam qadam mile jo aable rah-e-hayat mein

to aansuon ko misl-e-abshaar kar liya gaya

umid-e-subh-o-sham gham ke darmiyan basar jo ki

to saaton ko dard mein shumar kar liya gaya

mila fareb-o-makr se bhi kab wo hila jo magar

libas sadgi ka dagh-dar kar liya gaya

nakir ne madad baDi hisab rakh ke ki meri

gunah tamam umr be-shumar kar liya gaya

zaban-o-jism-o-jaan-o-dil gawah sab jo ban gae

to jurm un se ho ke darkinar kar liya gaya

gawah adliya subut hashiyon pe aa gae

hikayaton pe aise e'tibar kar liya gaya

zaban-e-haal muntaKHab hui bayan-e-dard ko

wajud aap apna tar-tar kar liya gaya

garan zamin-e-kisht-e-gham-e-jigar ko naqd ki ada

masarraton ka wahm tha udhaar kar liya gaya

jo ek jam 'farhat'-e-hayat ki umid tha

sitam ye hai ki wo bhi kal pukar kar liya gaya