sukun kahan KHalish-e-dard-e-moatabar ke baghair

sukūñ kahāñ ḳhalish-e-dard-e-mo'atabar ke baġhair

hañsī laboñ pe na aa.egī chashm-e-tar ke baġhair

hazār fāsle haa.el the raah meñ lekin

tumhāre jalvoñ ko dekhā kiye nazar ke baġhair

rah-e-hayāt kī dushvāriyāñ vo kyā jaane

safar kiyā hī na ho jis ne ham-safar ke baġhair

diye haiñ kitne sahāre shikasta-pā.ī ne

chalā huuñ manzil-e-jānāñ ko rāhbar ke baġhair

gilā nahīñ hai agar aap mujh ko bhuul ga.e

guzar hī jā.eñgī rāteñ mirī sahar ke baġhair

ḳhamoshiyoñ ne bahut zabt-e-ġham kiyā lekin

koī asar na huā āh-e-be-asar ke baġhair

tumhārī yaad ne pahuñchā diyā kahāñ mujh ko

safar tamām huā ālam-e-safar ke baġhair

vo din ga.e ki ġham-e-dil ko fikr-e-darmāñ thī

tabī'at ab to sañbhaltī hai chārāgar ke baġhair

na jaane kaunsī manzil nazar meñ hai 'sājid'

ḳhulūs-e-dil ne jo sajde kiye haiñ sar ke baġhair

sukun kahan KHalish-e-dard-e-mo'atabar ke baghair

hansi labon pe na aaegi chashm-e-tar ke baghair

hazar fasle hael the rah mein lekin

tumhaare jalwon ko dekha kiye nazar ke baghair

rah-e-hayat ki dushwariyan wo kya jaane

safar kiya hi na ho jis ne ham-safar ke baghair

diye hain kitne sahaare shikasta-pai ne

chala hun manzil-e-jaanan ko rahbar ke baghair

gila nahin hai agar aap mujh ko bhul gae

guzar hi jaengi raaten meri sahar ke baghair

KHamoshiyon ne bahut zabt-e-gham kiya lekin

koi asar na hua aah-e-be-asar ke baghair

tumhaari yaad ne pahuncha diya kahan mujh ko

safar tamam hua aalam-e-safar ke baghair

wo din gae ki gham-e-dil ko fikr-e-darman thi

tabi'at ab to sanbhalti hai chaaragar ke baghair

na jaane kaunsi manzil nazar mein hai 'sajid'

KHulus-e-dil ne jo sajde kiye hain sar ke baghair