sukun milta nahin jab bhi to man ki yaad aati hai

sukūñ miltā nahīñ jab bhī to maañ kī yaad aatī hai

ki jaise bārishoñ kī rut meñ chhatrī yaad aatī hai

kahīñ is shahr kī āb-o-havā meñ dam na ghuT jaa.e

ki mujh ko gaañv kī soñdhī sī miTTī yaad aatī hai

dikhā.ūñ 'ishq kī pākīzgī kaise tumheñ jānāñ

ḳhudā ke zikr par aksar tumhārī yaad aatī hai

sabab mat pūchhnā mujh se tum us ko yaad karne kā

maraz ke had se baḌhne par ḳhudā kī yaad aatī hai

vo laḌkī chhoḌ aayā thā jise maiñ bad-gumānī meñ

akele meñ vahī laḌkī sisaktī yaad aatī hai

isī ummīd par ab tak ġhazal kahtā rahā huuñ maiñ

kabhī vo pūchh le shāyad ki kis kī yaad aatī hai

musībat mol lene kī hai ik tarkīb ye bhī 'harsh'

use itnā kaho terī sahelī yaad aatī hai

sukun milta nahin jab bhi to man ki yaad aati hai

ki jaise barishon ki rut mein chhatri yaad aati hai

kahin is shahr ki aab-o-hawa mein dam na ghuT jae

ki mujh ko ganw ki sondhi si miTTi yaad aati hai

dikhaun 'ishq ki pakizgi kaise tumhein jaanan

KHuda ke zikr par aksar tumhaari yaad aati hai

sabab mat puchhna mujh se tum us ko yaad karne ka

maraz ke had se baDhne par KHuda ki yaad aati hai

wo laDki chhoD aaya tha jise main bad-gumani mein

akele mein wahi laDki sisakti yaad aati hai

isi ummid par ab tak ghazal kahta raha hun main

kabhi wo puchh le shayad ki kis ki yaad aati hai

musibat mol lene ki hai ek tarkib ye bhi 'harsh'

use itna kaho teri saheli yaad aati hai