sukun paya tabiat ne na dil ko hi qarar aaya

sukūñ paayā tabī.at ne na dil ko hī qarār aayā

jo aañsū aañkh meñ aayā baḌā be-e'tibār aayā

kisī kā bāñkpan saare zamāne meñ pukār aayā

chamak āñkhoñ meñ aa.ī nok-e-mizhgāñ par nikhār aayā

muqaddar apnā apnā hai gul-o-shabnam kī vaadī meñ

koī hañstā huā aayā to koī ashk-bār aayā

mujhe kyā vāsta hai aap ke husn-e-taḳhyyul se

mirī āñkhoñ pe jab aayā mire ḳhvāboñ ko pyaar aayā

tirī be-iltifātī ko ḳhudā rakhe ki ai saaqī

sharāb-e-ġham se ham tishna-laboñ par bhī ḳhumār aayā

hue haiñ rañg-o-bū dast-o-garebāñ aise gulshan meñ

nasīm-e-sub.h kā dāman bhī ho kar taar taar aayā

dhuāñ jo be-kasoñ kī aah kā uTThā to ai 'jumbish'

chaman vaale pukār uTThe ki vo abr-e-bahār aayā

sukun paya tabiat ne na dil ko hi qarar aaya

jo aansu aankh mein aaya baDa be-e'tibar aaya

kisi ka bankpan sare zamane mein pukar aaya

chamak aankhon mein aai nok-e-mizhgan par nikhaar aaya

muqaddar apna apna hai gul-o-shabnam ki wadi mein

koi hansta hua aaya to koi ashk-bar aaya

mujhe kya wasta hai aap ke husn-e-taKHyyul se

meri aankhon pe jab aaya mere KHwabon ko pyar aaya

teri be-iltifati ko KHuda rakhe ki ai saqi

sharab-e-gham se hum tishna-labon par bhi KHumar aaya

hue hain rang-o-bu dast-o-gareban aise gulshan mein

nasim-e-subh ka daman bhi ho kar tar tar aaya

dhuan jo be-kason ki aah ka uTTha to ai 'jumbish'

chaman wale pukar uTThe ki wo abr-e-bahaar aaya