sukun pyar tabassum bahaar gul shabnam

sukūn pyaar tabassum bahār gul shabnam

ḳhushī meñ ziist ko kyā kyā samajh ga.e the ham

ġhamoñ se qalb-o-nazar kā badal gayā aalam

magar mizāj-e-tabassum na ho sakā barham

ye kis ko DhūñDte phirte haiñ mere dīda-e-nam

kahāñ vo log jo ab baañT leñ hayāt ke ġham

kis āftāb-sifat shaḳhs ke ruke the qadam

charāġh dair-o-haram ke haiñ aaj tak maddham

junūñ kī raah se guzrā nahīñ koī shāyad

kisī jagah to dikhā.ī de koī naqsh-e-qadam

ḳhirad pahuñch ke vahāñ aaj naaz kartī hai

vo jis maqām pe kal tak guzār aa.e ham

rah-e-vafā se guzarnā muhāl ho jaatā

agar 'nasīb' na hotā hamāre saath ye ġham

sukun pyar tabassum bahaar gul shabnam

KHushi mein zist ko kya kya samajh gae the hum

ghamon se qalb-o-nazar ka badal gaya aalam

magar mizaj-e-tabassum na ho saka barham

ye kis ko DhunDte phirte hain mere dida-e-nam

kahan wo log jo ab banT len hayat ke gham

kis aaftab-sifat shaKHs ke ruke the qadam

charagh dair-o-haram ke hain aaj tak maddham

junun ki rah se guzra nahin koi shayad

kisi jagah to dikhai de koi naqsh-e-qadam

KHirad pahunch ke wahan aaj naz karti hai

wo jis maqam pe kal tak guzar aae hum

rah-e-wafa se guzarna muhaal ho jata

agar 'nasib' na hota hamare sath ye gham