sukut-e-asr mein gunji hui azan hun main

sukūt-e-asr meñ gūñjī huī azaan huuñ maiñ

bahut se girtī nashīnoñ ke darmiyān huuñ maiñ

adab kī karb-o-balā kūfa-e-sadā hai gavāh

havā-e-shām kā likkhā huā bayān huuñ maiñ

vo ḳhema-gāh-e-mohabbat to jal ga.ī kab kī

aur us kī raakh meñ muddat se nīm-jān huuñ maiñ

furāt-e-tishnagī-e-shauq rū-ba-rū tere

jise jalāyā gayā thā vahī makān huuñ maiñ

vo TuuTā neza vo be-chādarī vo shām-e-alam

kabhī jo ḳhatm na hogī vo dāstān huuñ maiñ

gulū-e-tishna-labī dekh kis salīqe se

kashīda tiir sambhāle hue kamān huuñ maiñ

sharī.at-e-dil-o-duniyā uThā.e phirtī rahī

vo kah rahā hai magar phir bhī nā-tavān huuñ maiñ

ye bām-o-dar ko sajāyā gayā hai mere liye

nazzārgī tirī ḳhātir lahūluhān huuñ maiñ

sukut-e-asr mein gunji hui azan hun main

bahut se girti nashinon ke darmiyan hun main

adab ki karb-o-bala kufa-e-sada hai gawah

hawa-e-sham ka likkha hua bayan hun main

wo KHema-gah-e-mohabbat to jal gai kab ki

aur us ki rakh mein muddat se nim-jaan hun main

furaat-e-tishnagi-e-shauq ru-ba-ru tere

jise jalaya gaya tha wahi makan hun main

wo TuTa neza wo be-chadari wo sham-e-alam

kabhi jo KHatm na hogi wo dastan hun main

gulu-e-tishna-labi dekh kis saliqe se

kashida tir sambhaale hue kaman hun main

shariat-e-dil-o-duniya uThae phirti rahi

wo kah raha hai magar phir bhi na-tawan hun main

ye baam-o-dar ko sajaya gaya hai mere liye

nazzargi teri KHatir lahuluhan hun main