sukut-e-dil ki taraf hain samaaten apni

sukūt-e-dil kī taraf haiñ samā.ateñ apnī

hameñ pukār rahī haiñ haqīqateñ apnī

tire sitam bhī musalsal haiñ aur phir is par

ḳhud apne dil ko dukhāne kī ādateñ apnī

yahāñ sab ahl-e-ḳhirad aur maiñ ik ahl-e-junūñ

badal sakūñ bhī to kis se tabī.ateñ apnī

ḳhudā ko sauñp diye kaam to sabhī lekin

maiñ us ke naam na kar paayā fursateñ apnī

vo ek ahd-e-javānī jo rā.egāñ guzrā

tamām umr dikhā.egā vahshateñ apnī

ḳhud ek had meñ sameTe hue vajūd apnā

talāsh kartā rahā huuñ maiñ vus.ateñ apnī

inhī ke sadqe bachī hai amal kī gunjā.ish

baḌe hī dhyān se sunñā shikāyateñ apnī

ajab nahīñ vo ḳhudā ban ke phir rahā hai agar

sañbhal sakī haiñ bhalā kis se shohrateñ apnī

so tai huā hai sar-e-bazm-e-dushmanāñ ye hī

ḳhud apnā qatl kareñgī rifāqateñ apnī

agar burā na lage tujh ko ek baat kahūñ

tū apne paas hī rakh sab nasīhateñ apnī

tujhe 'amar' tirī be-chehragī mubārak ho

miTā de aur bhī saarī sabāhateñ apnī

sukut-e-dil ki taraf hain samaaten apni

hamein pukar rahi hain haqiqaten apni

tere sitam bhi musalsal hain aur phir is par

KHud apne dil ko dukhane ki aadaten apni

yahan sab ahl-e-KHirad aur main ek ahl-e-junun

badal sakun bhi to kis se tabiaten apni

KHuda ko saunp diye kaam to sabhi lekin

main us ke nam na kar paya fursaten apni

wo ek ahd-e-jawani jo raegan guzra

tamam umr dikhaega wahshaten apni

KHud ek had mein sameTe hue wajud apna

talash karta raha hun main wusaten apni

inhi ke sadqe bachi hai amal ki gunjaish

baDe hi dhyan se sunna shikayaten apni

ajab nahin wo KHuda ban ke phir raha hai agar

sanbhal saki hain bhala kis se shohraten apni

so tai hua hai sar-e-bazm-e-dushmanan ye hi

KHud apna qatl karengi rifaqaten apni

agar bura na lage tujh ko ek baat kahun

tu apne pas hi rakh sab nasihaten apni

tujhe 'amar' teri be-chehragi mubarak ho

miTa de aur bhi sari sabahaten apni