sukut-e-gham se baqi hai magar rasm-e-payam ab bhi

sukūt-e-ġham se baaqī hai magar rasm-e-payām ab bhī

shab-e-tārīk meñ huuñ mehr-o-mah se ham-kalām ab bhī

lab-e-ḳhāmosh par maanā ki ab naale nahīñ aate

nigāhoñ meñ magar baaqī hai andāz-e-kalām ab bhī

bhulā dene kī paiham koshishoñ ke baa'd bhī nāseh

baḌhā detā hai dil kī dhaḌkaneñ us but kā naam ab bhī

nahīñ vo nisbat-e-derīna lekin is ko kyā kahiye

vahī ham haiñ vahī aglī sī hai rasm-e-salām ab bhī

suno 'ahd-e-vafā kī 'azmatoñ ko bhūlne vaalo

mirī nazroñ meñ hai 'ahd-e-vafā kā ehtirām ab bhī

tumhāre zulf-o-'āriz kī qasam ab bhī jo maiñ chāhūñ

ishāroñ se badal saktā huuñ daur-e-sub.h-o-shām ab bhī

kabhī aate haiñ vo to ehtirāman uTh hī jaatā huuñ

janāb-e-shaiḳh kā baaqī hai dil meñ ehtirām ab bhī

sukut-e-gham se baqi hai magar rasm-e-payam ab bhi

shab-e-tarik mein hun mehr-o-mah se ham-kalam ab bhi

lab-e-KHamosh par mana ki ab nale nahin aate

nigahon mein magar baqi hai andaz-e-kalam ab bhi

bhula dene ki paiham koshishon ke ba'd bhi naseh

baDha deta hai dil ki dhaDkanen us but ka nam ab bhi

nahin wo nisbat-e-derina lekin is ko kya kahiye

wahi hum hain wahi agli si hai rasm-e-salam ab bhi

suno 'ahd-e-wafa ki 'azmaton ko bhulne walo

meri nazron mein hai 'ahd-e-wafa ka ehtiram ab bhi

tumhaare zulf-o-'ariz ki qasam ab bhi jo main chahun

ishaaron se badal sakta hun daur-e-subh-o-sham ab bhi

kabhi aate hain wo to ehtiraman uTh hi jata hun

janab-e-shaiKH ka baqi hai dil mein ehtiram ab bhi