sukut-e-jism ka ehsas jis paikar pe rakkha tha

sukūt-e-jism kā ehsās jis paikar pe rakkhā thā

darīñ-asnā vo jism-e-ḳhāk ik mehvar pe rakkhā thā

bahut mānūs sī lagne lagī vo lams kī hiddat

larazte haath ko maiñ ne jab us ke dar pe rakkhā thā

haqīqat kyā 'ayāñ hotī kisī tasvīr-e-‘aksī se

vo ik jhūTā nazāra thā vo jis manzar pe rakkhā thā

yaqīñ mohkam thā vo hai be-hisī kī mūrtī lekin

ye sar phir bhī 'aqīdat se usī patthar pe rakkhā thā

chhalak jaanā thā āñkhoñ se lahū merī kahānī par

mire maazī kā har lamha kisī ḳhanjar pe rakkhā thā

jab us ko dekhnī thī bhiiḌ meñ bāzār kī raunaq

tab us bachche ne ghar kā bojh apne sar pe rakkhā thā

sukut-e-jism ka ehsas jis paikar pe rakkha tha

darin-asna wo jism-e-KHak ek mehwar pe rakkha tha

bahut manus si lagne lagi wo lams ki hiddat

larazte hath ko main ne jab us ke dar pe rakkha tha

haqiqat kya 'ayan hoti kisi taswir-e-‘aksi se

wo ek jhuTa nazara tha wo jis manzar pe rakkha tha

yaqin mohkam tha wo hai be-hisi ki murti lekin

ye sar phir bhi 'aqidat se usi patthar pe rakkha tha

chhalak jaana tha aankhon se lahu meri kahani par

mere mazi ka har lamha kisi KHanjar pe rakkha tha

jab us ko dekhni thi bhiD mein bazar ki raunaq

tab us bachche ne ghar ka bojh apne sar pe rakkha tha