sukut-e-marg mein kyun rah-e-naghma-gar dekhun

sukūt-e-marg meñ kyuuñ rāh-e-naġhma-gar dekhūñ

maiñ ḳhud hī saaz kī mānind TuuT kar dekhūñ

mire dayār tire shahr haiñ ki sahrā haiñ

maiñ ek tarah kā manzar nagar nagar dekhūñ

vahī hoñ āriz-o-abarū-o-chashm-o-lab phir bhī

har ek chehre pe ik chehra-e-digar dekhūñ

ziyā-e-najm-o-mah-o-mehr-o-kahkashāñ se alag

ajiib raushaniyāñ tujh ko dekh kar dekhūñ

mirī kamī tujhe mahsūs ho rahī thī jahāñ

vahīñ pahuñch ke tirī raah umr bhar dekhūñ

ġhubār-e-rāh-e-numā.ī se aT ga.ī hai fazā

taras gayā huuñ ki rāhoñ ko ik nazar dekhūñ

tirī shahī kī havas meñ hai merī jaañ kā ziyāñ

maiñ tere taaj ko dekhūñ ki apnā sar dekhūñ

na pūchh harf-e-tamannā kī vus.ateñ 'sādiq'

chale jo baat to sadiyāñ bhī muḳhtasar dekhūñ

sukut-e-marg mein kyun rah-e-naghma-gar dekhun

main KHud hi saz ki manind TuT kar dekhun

mere dayar tere shahr hain ki sahra hain

main ek tarah ka manzar nagar nagar dekhun

wahi hon aariz-o-abaru-o-chashm-o-lab phir bhi

har ek chehre pe ek chehra-e-digar dekhun

ziya-e-najm-o-mah-o-mehr-o-kahkashan se alag

ajib raushaniyan tujh ko dekh kar dekhun

meri kami tujhe mahsus ho rahi thi jahan

wahin pahunch ke teri rah umr bhar dekhun

ghubar-e-rah-e-numai se aT gai hai faza

taras gaya hun ki rahon ko ek nazar dekhun

teri shahi ki hawas mein hai meri jaan ka ziyan

main tere taj ko dekhun ki apna sar dekhun

na puchh harf-e-tamanna ki wusaten 'sadiq'

chale jo baat to sadiyan bhi muKHtasar dekhun