sukut-e-shab hai nihaal-e-guman sanbhaale hue

sukūt-e-shab hai nihāl-e-gumāñ sañbhāle hue

varaq-varaq hai koī dāstāñ sañbhāle hue

falak kī gardisheñ āvāz de rahī haiñ mujhe

na jaane kab se haiñ tasvīr-e-jāñ sañbhāle hue

ye kaun mujh se nikal kar abhī farār huā

ye kaun mujh meñ hai tīr-o-kamāñ sañbhāle hue

tirā vajūd hai āsāñ magar ye mushkil hai

ki merī zaat hai sūd-o-ziyāñ sañbhāle hue

shafaq ke paar kahīñ jā ke ab bikharne de

ki TūTtā hai badan imtihāñ sañbhāle hue

na koī dard hai dard-e-nihāñ se milte hue

na hai duā koī merā jahāñ sañbhāle hue

na koī rang hai aks-e-safar pe jamtā huā

na koī ḳhvāb hai chashm-e-garāñ sañbhāle hue

bas ek rang hai rang-e-safar se haTtā huā

bas ik kiran hai karāñ-tā-karāñ sañbhāle hue

hamāre dasht-e-talab se sabā-ḳhirām gayā

vo apnī nok-e-palak par jahāñ sañbhāle hue

ye jaan kab se hai us kī navā ke zaḳhm liye

ye sar hai kab se koī āsmāñ sañbhāle hue

kaho ye 'ramz' se 'ajmal' kī bhī ġhazal sun le

vahī to hai tirā soz-e-nihāñ sañbhāle hue

sukut-e-shab hai nihaal-e-guman sanbhaale hue

waraq-waraq hai koi dastan sanbhaale hue

falak ki gardishen aawaz de rahi hain mujhe

na jaane kab se hain taswir-e-jaan sanbhaale hue

ye kaun mujh se nikal kar abhi farar hua

ye kaun mujh mein hai tir-o-kaman sanbhaale hue

tera wajud hai aasan magar ye mushkil hai

ki meri zat hai sud-o-ziyan sanbhaale hue

shafaq ke par kahin ja ke ab bikharne de

ki TuTta hai badan imtihan sanbhaale hue

na koi dard hai dard-e-nihan se milte hue

na hai dua koi mera jahan sanbhaale hue

na koi rang hai aks-e-safar pe jamta hua

na koi KHwab hai chashm-e-garan sanbhaale hue

bas ek rang hai rang-e-safar se haTta hua

bas ek kiran hai karan-ta-karan sanbhaale hue

hamare dasht-e-talab se saba-KHiram gaya

wo apni nok-e-palak par jahan sanbhaale hue

ye jaan kab se hai us ki nawa ke zaKHm liye

ye sar hai kab se koi aasman sanbhaale hue

kaho ye 'ramz' se 'ajmal' ki bhi ghazal sun le

wahi to hai tera soz-e-nihan sanbhaale hue