sukut-e-shab ne pukara to sab nikal aae

sukūt-e-shab ne pukārā to sab nikal aa.e

hameñ ḳhabar na huī jaane kab nikal aa.e

abhī to ret sī bikhrī huī thī hadd-e-nigāh

zarā sī aañkh lagī naḳhl-e-shab nikal aa.e

vo terī niiñd thī jo be-ḳhabar rahī shab bhar

vo mere ḳhvāb the jo bā-adab nikal aa.e

nikālnā thā ġhubār-e-safar magar ye qadam

havā-e-shauq meñ sahrā-talab nikal aa.e

qadam qadam pe yahāñ qahqahe lage hue haiñ

ye kaise shahr meñ ham be-sabab nikal aa.e

phir ek lamhe ko Thahrā nahīñ gayā ham se

hamāre dil ne kahā ab to ab nikal aa.e

sukut-e-shab ne pukara to sab nikal aae

hamein KHabar na hui jaane kab nikal aae

abhi to ret si bikhri hui thi hadd-e-nigah

zara si aankh lagi naKHl-e-shab nikal aae

wo teri nind thi jo be-KHabar rahi shab bhar

wo mere KHwab the jo ba-adab nikal aae

nikalna tha ghubar-e-safar magar ye qadam

hawa-e-shauq mein sahra-talab nikal aae

qadam qadam pe yahan qahqahe lage hue hain

ye kaise shahr mein hum be-sabab nikal aae

phir ek lamhe ko Thahra nahin gaya hum se

hamare dil ne kaha ab to ab nikal aae