sulag rahi hai zamin ya siphar aankhon mein

sulag rahī hai zamīñ yā sip.har āñkhoñ meñ

dhuāñ dhuāñ sā hai kyuuñ terā shahr āñkhoñ meñ

khule darīche ke bāhar hai kaun sā mausam

ki aag bharne lagī sard lahr āñkhoñ meñ

kahāñ hai niiñd ki ham ḳhvāb dekheñ amrit kā

jo shaam guzrī hai us kā hai zahr āñkhoñ meñ

ḳhafā hue bhī kisī se to kyā kiyā ham ne

bahut huā to rahā dil kā qahr āñkhoñ meñ

koī utārne baiThe to haath jal jaa.e

khiñchī hai ab ke vo tasvīr-e-dahr āñkhoñ meñ

vahī hai pyaas kā manzar vahī lahū 'qaisar'

hanūz phirtī hai kone kī nahr āñkhoñ meñ

sulag rahi hai zamin ya siphar aankhon mein

dhuan dhuan sa hai kyun tera shahr aankhon mein

khule dariche ke bahar hai kaun sa mausam

ki aag bharne lagi sard lahr aankhon mein

kahan hai nind ki hum KHwab dekhen amrit ka

jo sham guzri hai us ka hai zahr aankhon mein

KHafa hue bhi kisi se to kya kiya hum ne

bahut hua to raha dil ka qahr aankhon mein

koi utarne baiThe to hath jal jae

khinchi hai ab ke wo taswir-e-dahr aankhon mein

wahi hai pyas ka manzar wahi lahu 'qaisar'

hanuz phirti hai kone ki nahr aankhon mein