sulag uThe mere mausam ye kya kiya tu ne

sulag uThe mire mausam ye kyā kiyā tū ne

guloñ pe jal ga.ī shabnam ye kyā kiyā tū ne

zamīñ nahīñ hai faqat sogvār is ġham kī

falak pe chhā gayā mātam ye kyā kiyā tū ne

nayan to suukh ga.e dard kī tapish pā kar

nazar se risne lagā ġham ye kyā kiyā tū ne

rahā na yaad tere ba.ad koī is dil ko

ki sab ko bhuul ga.e ham ye kyā kiyā tū ne

ghaTā rahā thā tujhe apnī zaat se lekin

maiñ ḳhud bhī hone lagā kam ye kyā kiyā tū ne

phir is ke ba.ad kabhī ā.īne ke aage bhī

nazar uThā sake na ham ye kyā kiyā tū ne

vo shaḳhs chāhtā thā umr bhar rahe mujh meñ

jo mujh meñ toḌ gayā dam ye kyā kiyā tū ne

mirī hayāt mirī zaat merī ummīdeñ

sisaktī rahtī haiñ paiham ye kyā kiyā tū ne

sulag uThe mere mausam ye kya kiya tu ne

gulon pe jal gai shabnam ye kya kiya tu ne

zamin nahin hai faqat sogwar is gham ki

falak pe chha gaya matam ye kya kiya tu ne

nayan to sukh gae dard ki tapish pa kar

nazar se risne laga gham ye kya kiya tu ne

raha na yaad tere baad koi is dil ko

ki sab ko bhul gae hum ye kya kiya tu ne

ghaTa raha tha tujhe apni zat se lekin

main KHud bhi hone laga kam ye kya kiya tu ne

phir is ke baad kabhi aaine ke aage bhi

nazar uTha sake na hum ye kya kiya tu ne

wo shaKHs chahta tha umr bhar rahe mujh mein

jo mujh mein toD gaya dam ye kya kiya tu ne

meri hayat meri zat meri ummiden

sisakti rahti hain paiham ye kya kiya tu ne