sulagti aankhon ne ashkon se dosti kar li

sulagtī āñkhoñ ne ashkoñ se dostī kar lī

hamāre ḳhvāboñ ne kal raat ḳhud-kushī kar lī

har ek samt thā tūfāñ bhañvar meñ thī kashtī

aur is pe ham ne kināroñ se dushmanī kar lī

añdherī raat thī ghar meñ koī charāġh na thā

jalā ke apnā hī dil ham ne raushnī kar lī

hamāre lab abhī tishna haiñ guftugū ke liye

agarche ham ne nigāhoñ se baat bhī kar lī

yaqīn ḳhud ko nahīñ hai magar haqīqat hai

tire baġhair basar ham ne zindagī kar lī

tumhāre dam se thiiñ gulshan meñ raunaqeñ saarī

tumhāre baa'd bahāroñ ne ḳhud-kushī kar lī

vo dard ban ke hamesha hamāre dil meñ rahā

jab had se dard baḌhā ham ne shā.erī kar lī

Thikāna DhūñD rahe haiñ parinde phir koī

shajar ne tund havāoñ se dostī kar lī

'fahīm' us kī nigāheñ haiñ jhiil kī mānind

ham un meñ kuud ga.e aur shanāvarī kar lī

sulagti aankhon ne ashkon se dosti kar li

hamare KHwabon ne kal raat KHud-kushi kar li

har ek samt tha tufan bhanwar mein thi kashti

aur is pe hum ne kinaron se dushmani kar li

andheri raat thi ghar mein koi charagh na tha

jala ke apna hi dil hum ne raushni kar li

hamare lab abhi tishna hain guftugu ke liye

agarche hum ne nigahon se baat bhi kar li

yaqin KHud ko nahin hai magar haqiqat hai

tere baghair basar hum ne zindagi kar li

tumhaare dam se thin gulshan mein raunaqen sari

tumhaare ba'd bahaaron ne KHud-kushi kar li

wo dard ban ke hamesha hamare dil mein raha

jab had se dard baDha hum ne shaeri kar li

Thikana DhunD rahe hain parinde phir koi

shajar ne tund hawaon se dosti kar li

'fahim' us ki nigahen hain jhil ki manind

hum un mein kud gae aur shanawari kar li