sulagti dhup thi dasht-o-jabal the banjar the

sulagtī dhuup thī dasht-o-jabal the banjar the

jahāñ jahāñ se bhī guzre ajiib manzar the

jo maañ kī kokh se nikle tirī talāsh rahī

lahad nasīb huī jab bhī tere ḳhūgar the

badal chukī hai achānak harārat-e-arzī

javālā phuuT rahe haiñ jahāñ samundar the

sarāb jaise guzārī hai zindagī ham ne

ki duur hī se lubhāne meñ ham hunar-var the

na but tarāshe na puuje na toḌ Daale magar

kisī bhī shahr meñ aa.e ba-shakl-e-āzar the

hamārī maut se pahle hī kitne logoñ ne

hamāre baare meñ likkhā thā ham gadāgar the

maiñ jin ke biich meñ leTā thā be-his-o-harakat

luTe-piTe the musāfir kaTe hue sar the

vo din ki maañ kī du'ā.eñ panāh thiiñ 'īraj'

kañval the raat kī raanī the ham gul-e-tar the

sulagti dhup thi dasht-o-jabal the banjar the

jahan jahan se bhi guzre ajib manzar the

jo man ki kokh se nikle teri talash rahi

lahad nasib hui jab bhi tere KHugar the

badal chuki hai achanak hararat-e-arzi

jawala phuT rahe hain jahan samundar the

sarab jaise guzari hai zindagi hum ne

ki dur hi se lubhane mein hum hunar-war the

na but tarashe na puje na toD Dale magar

kisi bhi shahr mein aae ba-shakl-e-azar the

hamari maut se pahle hi kitne logon ne

hamare bare mein likkha tha hum gadagar the

main jin ke bich mein leTa tha be-his-o-harakat

luTe-piTe the musafir kaTe hue sar the

wo din ki man ki du'aen panah thin 'iraj'

kanwal the raat ki rani the hum gul-e-tar the