sulagti ret mein ek chehra aab sa chamka

sulagtī ret meñ ik chehra aab sā chamkā

udaas ā.ankhoñ meñ jiine kā hausla chamkā

añdherī raat meñ ye kis kā naqsh-e-pā chamkā

musāfiroñ kī nigāhoñ meñ rāsta chamkā

shab-e-firāq meñ koī sitāra TuuTā to

hamārī soch meñ an-jānā vasvasa chamkā

fazā meñ phail ga.e kitne yaad ke jugnū

dayār-e-shauq meñ jab koī rat-jagā chamkā

udāsiyoñ ke añdhere Darā rahe the mujhe

ki hāfize meñ achānak tirā kahā chamkā

bikhar rahī hai ḳhayāloñ meñ ḳhvāb kī ḳhushbū

vajūd ban ke kahāñ koī ḳhush-adā chamkā

chhupā.e chhup na sakā maiñ to bhiiḌ meñ 'amabar'

na jaane kaise mujhī par vo dā.era chamkā

sulagti ret mein ek chehra aab sa chamka

udas aaankhon mein jine ka hausla chamka

andheri raat mein ye kis ka naqsh-e-pa chamka

musafiron ki nigahon mein rasta chamka

shab-e-firaq mein koi sitara TuTa to

hamari soch mein an-jaana waswasa chamka

faza mein phail gae kitne yaad ke jugnu

dayar-e-shauq mein jab koi rat-jaga chamka

udasiyon ke andhere Dara rahe the mujhe

ki hafize mein achanak tera kaha chamka

bikhar rahi hai KHayalon mein KHwab ki KHushbu

wajud ban ke kahan koi KHush-ada chamka

chhupae chhup na saka main to bhiD mein 'amabar'

na jaane kaise mujhi par wo daera chamka