sulagti ret pe KHema laga ke dekha hai

sulagtī ret pe ḳhema lagā ke dekhā hai

hamīñ ne dasht ko maskan banā ke dekhā hai

hamāre sher tumheñ kis tarah samajh aa.eñ

hamārā haal kahāñ tum ne aa ke dekhā hai

kuchh is tarah se bitā.ī haiñ hijr kī rāteñ

ke jaise mausam-e-garmā bitā ke dekhā hai

vahī batā.egā umr-e-hayāt kitnī hai

vo jis ne ret pe chehra banā ke dekhā hai

unheñ thā shauq-e-masīhā.ī ham bhī āshiq the

so ham ne apnā galā bhī kaTā ke dekhā hai

sunā thā ishq meñ hai sabr lāzim-o-malzūm

to intizār bhī palkeñ bichhā ke dekhā hai

hamārī āñkheñ kaheñgī na jaane kab ham se

kisī ne aaj hameñ muskurā ke dekhā hai

hamāre sar pe thā ilzām be-vafā.ī kā

so apne aap ko apnā banā ke dekhā hai

ta'alluqāt meñ aane lagī kamī 'hānī'

ta.assubāt ne kyā sar uThā ke dekhā hai

sulagti ret pe KHema laga ke dekha hai

hamin ne dasht ko maskan bana ke dekha hai

hamare sher tumhein kis tarah samajh aaen

hamara haal kahan tum ne aa ke dekha hai

kuchh is tarah se bitai hain hijr ki raaten

ke jaise mausam-e-garma bita ke dekha hai

wahi bataega umr-e-hayat kitni hai

wo jis ne ret pe chehra bana ke dekha hai

unhen tha shauq-e-masihai hum bhi aashiq the

so hum ne apna gala bhi kaTa ke dekha hai

suna tha ishq mein hai sabr lazim-o-malzum

to intizar bhi palken bichha ke dekha hai

hamari aankhen kahengi na jaane kab hum se

kisi ne aaj hamein muskura ke dekha hai

hamare sar pe tha ilzam be-wafai ka

so apne aap ko apna bana ke dekha hai

ta'alluqat mein aane lagi kami 'hani'

tassubaat ne kya sar uTha ke dekha hai