suluk usne mohabbat mein ajab mujhse rawa rakkha

sulūk us ne mohabbat meñ 'ajab mujh se ravā rakkhā

hamesha mere apne darmiyāñ ik fāsla rakkhā

tumhāre paas aate hī jalā diiñ kashtiyāñ saarī

ki maiñ ne lauT jaane kā na koī rāsta rakkhā

tumhāre pyaar meñ ab aur kitnī darguzar kartī

tumhārī har jafā kā naam maiñ ne ik adā rakkhā

tumhāre bin rahe suune ye mere bām-o-dar kitne

na aa.e tum magar maiñ ne to darvāza khulā rakkhā

tavaqqo' aur se kyoñ ho mujhe hājat-ravā.ī kī

ḳhudā ke sāmne phailā ke jab dast-e-du'ā rakkhā

na thā kuchh rabt hī shāyad tire dil kā mire dil se

na lauTe tum na tum ne mujh se koī rābta rakkhā

havā kā dekhnā maqsūd mujh ko zarf hai 'azrā'

havā ke dosh par maiñ ne jalā kar ik diyā rakkhā

suluk us ne mohabbat mein 'ajab mujh se rawa rakkha

hamesha mere apne darmiyan ek fasla rakkha

tumhaare pas aate hi jala din kashtiyan sari

ki main ne lauT jaane ka na koi rasta rakkha

tumhaare pyar mein ab aur kitni darguzar karti

tumhaari har jafa ka nam main ne ek ada rakkha

tumhaare bin rahe sune ye mere baam-o-dar kitne

na aae tum magar main ne to darwaza khula rakkha

tawaqqo' aur se kyon ho mujhe hajat-rawai ki

KHuda ke samne phaila ke jab dast-e-du'a rakkha

na tha kuchh rabt hi shayad tere dil ka mere dil se

na lauTe tum na tum ne mujh se koi rabta rakkha

hawa ka dekhna maqsud mujh ko zarf hai 'azra'

hawa ke dosh par main ne jala kar ek diya rakkha