suna hai jab se ki tumko bhi gham gawara hai

sunā hai jab se ki tum ko bhī ġham gavārā hai

ḳhayāl ab hameñ apnā nahīñ tumhārā hai

kabhī jo suntā huuñ āvāz-e-bāzgasht apnī

to sochtā huuñ ki tum ne mujhe pukārā hai

kahāñ ga.ī mirī zinda-dilī maiñ kyoñ sochūñ

ye farz merā nahīñ dosto tumhārā hai

zamāne bhar ko agar gul to ham ko ḳhaar 'azīz

zamāne bhar se alag mudda'ā hamārā hai

ye raat ab yūñhī kāñToñ pe loTnā hai 'ra.īs'

ki tū ne phūloñ ke saa.e meñ din guzārā hai

suna hai jab se ki tum ko bhi gham gawara hai

KHayal ab hamein apna nahin tumhaara hai

kabhi jo sunta hun aawaz-e-bazgasht apni

to sochta hun ki tum ne mujhe pukara hai

kahan gai meri zinda-dili main kyon sochun

ye farz mera nahin dosto tumhaara hai

zamane bhar ko agar gul to hum ko KHar 'aziz

zamane bhar se alag mudda'a hamara hai

ye raat ab yunhi kanTon pe loTna hai 'rais'

ki tu ne phulon ke sae mein din guzara hai