suna hai ki tum chahte ho kisi ko kuchh ahwal apni zabani kaho to

sunā hai ki tum chāhte ho kisī ko kuchh ahvāl apnī zabānī kaho to

ye kyā ukhḌī ukhḌī sī bāteñ haiñ sāhib ye dūbhar hai kyoñ zindagānī kaho to

suneñ ham bhī hai kaun vo māh-pāra ki is ghaaT jis ne tumheñ hai utārā

ye kis ke liye is qadar muztarib ho miTā.e ho apnī javānī kaho to

masīhā-e-daurāñ ho tum maiñ ne jaanā karo chārasāzī to ehsān mānūñ

karoge koī dard kā mere darmāñ dikhā.ūñ maiñ dāġh-e-nihānī kaho to

batātā to huuñ baat maiñ apne dil kī magar baat phir merī heTī na karnā

maiñ ḳhud.dār huuñ zabt hai merā sheva sunā.ūñ maiñ apnī kahānī kaho to

lo aao isī baat par 'ahd kar leñ hamāre hue tum tumhāre hue ham

nahīñ tum zabāñ se agar apnī phirte to phir kyoñ hai ye ānā-kānī kaho to

kahāñ āshiyāna vo apnā chaman meñ yā ab band huuñ tīliyoñ meñ qafas kī

asīrī pe apnī mujhe hai ta'ajjub magar maan luuñ daana paanī kaho to

batāo to ai 'ḳhār' kyā tum pe guzrī vo āġhāz-e-ulfat kī bāteñ huiiñ kyā

nahīñ hai vo andāz ab guftugū kā huī kyā vo sho'la-bayānī kaho to

suna hai ki tum chahte ho kisi ko kuchh ahwal apni zabani kaho to

ye kya ukhDi ukhDi si baaten hain sahib ye dubhar hai kyon zindagani kaho to

sunen hum bhi hai kaun wo mah-para ki is ghaT jis ne tumhein hai utara

ye kis ke liye is qadar muztarib ho miTae ho apni jawani kaho to

masiha-e-dauran ho tum main ne jaana karo chaarasazi to ehsan manun

karoge koi dard ka mere darman dikhaun main dagh-e-nihani kaho to

batata to hun baat main apne dil ki magar baat phir meri heTi na karna

main KHuddar hun zabt hai mera shewa sunaun main apni kahani kaho to

lo aao isi baat par 'ahd kar len hamare hue tum tumhaare hue hum

nahin tum zaban se agar apni phirte to phir kyon hai ye aana-kani kaho to

kahan aashiyana wo apna chaman mein ya ab band hun tiliyon mein qafas ki

asiri pe apni mujhe hai ta'ajjub magar man lun dana pani kaho to

batao to ai 'KHar' kya tum pe guzri wo aaghaz-e-ulfat ki baaten huin kya

nahin hai wo andaz ab guftugu ka hui kya wo sho'la-bayani kaho to