suna hai teri zamane pe hukmarani hai

sunā hai terī zamāne pe hukmarānī hai

magar na bhuul ki do din kī zindagānī hai

chaman kī saarī bahāroñ ke tum hī mālik ho

faqat hamāre muqaddar meñ bāġhbānī hai

maiñ kaise chhoḌ duuñ ghar ko kamā.ī kī ḳhātir

maiñ ik ġharīb huuñ biTiyā mirī siyānī hai

hisār-e-behisī hargiz na toḌ pā.eñge

vo jin ko dosto sham-e-amal bujhānī hai

bahāo khul ke ġharīboñ kā be-kasoñ kā lahū

nasīb se tumheñ hāsil zar-o-javānī hai

ḳhudā kī raah pe chal kar dikhā.iye 'ġhāzī'

jo kāmyāb tumheñ zindagī banānī hai

suna hai teri zamane pe hukmarani hai

magar na bhul ki do din ki zindagani hai

chaman ki sari bahaaron ke tum hi malik ho

faqat hamare muqaddar mein baghbani hai

main kaise chhoD dun ghar ko kamai ki KHatir

main ek gharib hun biTiya meri siyani hai

hisar-e-behisi hargiz na toD paenge

wo jin ko dosto sham-e-amal bujhani hai

bahao khul ke gharibon ka be-kason ka lahu

nasib se tumhein hasil zar-o-jawani hai

KHuda ki rah pe chal kar dikhaiye 'ghazi'

jo kaamyab tumhein zindagi banani hai