suna tha neza-o-talwar-o-KHanjar bech Dale hain

sunā thā neza-o-talvār-o-ḳhanjar bech Daale haiñ

magar zill-e-ilāhī ne to lashkar bech Daale haiñ

paḌī haiñ ret ke Tīloñ pe TuuTī kashtiyāñ apnī

huā hai ab ke maujoñ ne samundar bech Daale haiñ

agar vo merī āñkheñ bech detā to munāsib thā

magar us ne to in āñkhoñ ke manzar bech Daale haiñ

kisī ne ehtirāman ik ‘ajā.ib-ghar ke kamre meñ

hamāre jism rakkhe haiñ magar sar bech Daale haiñ

mohabbat se bhare ḳhat bhejte rahte the jo aksar

ab un logoñ ne bhī apne kabūtar bech Daale haiñ

kisī din apne bachchoñ se lipaT kar ro.eñge nādāñ

jinhoñ ne shahr jā kar gaañv ke ghar bech Daale haiñ

ye vo ehsān hai tujh se jo marte dam na utregā

ki terī parvarish meñ maañ ne zevar bech Daale haiñ

suna tha neza-o-talwar-o-KHanjar bech Dale hain

magar zill-e-ilahi ne to lashkar bech Dale hain

paDi hain ret ke Tilon pe TuTi kashtiyan apni

hua hai ab ke maujon ne samundar bech Dale hain

agar wo meri aankhen bech deta to munasib tha

magar us ne to in aankhon ke manzar bech Dale hain

kisi ne ehtiraman ek ‘ajaib-ghar ke kamre mein

hamare jism rakkhe hain magar sar bech Dale hain

mohabbat se bhare KHat bhejte rahte the jo aksar

ab un logon ne bhi apne kabutar bech Dale hain

kisi din apne bachchon se lipaT kar roenge nadan

jinhon ne shahr ja kar ganw ke ghar bech Dale hain

ye wo ehsan hai tujh se jo marte dam na utrega

ki teri parwarish mein man ne zewar bech Dale hain