sunata kya main use taqat-e-bayan na thi

sunātā kyā maiñ use tāqat-e-bayān na thī

kuchh aisī vaisī mohabbat kī dāstān na thī

tire sivā koī is ghar meñ kis tarah aatā

dil-e-figār thā kañjare kī ye dukān na thī

vo sang-e-ka.aba jo ik bosa-gāh-e-ālam hai

kahīñ tumhāre hī ghar kī to āstān na thī

jināñ meñ dekh ke hūreñ tū kyoñ na yaad aatā

ki terī sī vo malāhat vo ān-bān na thī

vo bosa teġh kā phir baar baar kyoñ letā

agar lahū meñ mire bū-e-za.afrān na thī

sab ek aan meñ be-parda raaz ho jaatā

tū shukr kar ki hameñ ḳhū-e-imtihān na thī

ġhazab ki kis tarah us but ne maar Daalā mujhe

kamāñ meñ tiir na thā haath meñ kamān na thī

kahīñ junūñ to nahīñ ho gayā tujhe 'nāyāb'

tū us ke pīchhe jo dauḌā ye terī shaan na thī

sunata kya main use taqat-e-bayan na thi

kuchh aisi waisi mohabbat ki dastan na thi

tere siwa koi is ghar mein kis tarah aata

dil-e-figar tha kanjare ki ye dukan na thi

wo sang-e-kaba jo ek bosa-gah-e-alam hai

kahin tumhaare hi ghar ki to aastan na thi

jinan mein dekh ke huren tu kyon na yaad aata

ki teri si wo malahat wo aan-ban na thi

wo bosa tegh ka phir bar bar kyon leta

agar lahu mein mere bu-e-zafran na thi

sab ek aan mein be-parda raaz ho jata

tu shukr kar ki hamein KHu-e-imtihan na thi

ghazab ki kis tarah us but ne mar Dala mujhe

kaman mein tir na tha hath mein kaman na thi

kahin junun to nahin ho gaya tujhe 'nayab'

tu us ke pichhe jo dauDa ye teri shan na thi