suni kisi ne kahan mere intizar ki baat

sunī kisī ne kahāñ mere intizār kī baat

har ik zabāñ pe rahī iḳhtiyār-e-yār kī baat

abhī hai vaqt chalo rābta bahāl kareñ

dilā.eñ yaad use ahd-e-pā.edār kī baat

abhī haiñ karb ke kuchh aur marhale baaqī

abhī chalī hī kahāñ hai mire dayār kī baat

yahāñ shajar kā shajar daav par hai nādānoñ

tumhāre lab pe vahī shāḳh-o-barg-o-bār kī baat

baḌā balīġh ishāra thā us kī bātoñ meñ

hamārā zikr thā aur raah ke ġhubār kī baat

kisī ke dil ke ujaḌne kī baat hai 'anvar'

ḳhizāñ kī baat nahīñ hai nahīñ bahār kī baat

suni kisi ne kahan mere intizar ki baat

har ek zaban pe rahi iKHtiyar-e-yar ki baat

abhi hai waqt chalo rabta bahaal karen

dilaen yaad use ahd-e-paedar ki baat

abhi hain karb ke kuchh aur marhale baqi

abhi chali hi kahan hai mere dayar ki baat

yahan shajar ka shajar daw par hai nadanon

tumhaare lab pe wahi shaKH-o-barg-o-bar ki baat

baDa baligh ishaara tha us ki baaton mein

hamara zikr tha aur rah ke ghubar ki baat

kisi ke dil ke ujaDne ki baat hai 'anwar'

KHizan ki baat nahin hai nahin bahaar ki baat