suno ki ishq-o-mohabbat ka tajdar hun main

suno ki ishq-o-mohabbat kā tājdār huuñ maiñ

mohabbatoñ ke safīne pe ab savār huuñ maiñ

gulāb khilte haiñ siine meñ mere sheroñ ke

so shāḳh-e-gul kī tarah se hī ḳhār-dār huuñ maiñ

na DhūñD ab tū mujhe zindagī kī rāhoñ meñ

tirī hayāt kī guzrī huī bahār huuñ maiñ

ye mere shāne pe jo sar hai ik amānat hai

salīb-e-arsa-e-hastī pe ik udhār huuñ maiñ

ḳhudā-e-pāk safīna utaar de merā

bahut zamāna huā sirf intizār huuñ maiñ

nahīñ hai ḳhud mujhe apnī hī zaat par koī haq

ye kis ne kah diyā hai ahl-e-iḳhtiyār huuñ maiñ

varaq varaq pe ka.ī naqsh the numāyāñ se

unhī nuqūsh se ubhrā sā iztirār huuñ maiñ

ḳhushī ke naġhme sunā.ūñ kahāñ se maiñ 'dānish'

ġham-o-alam kī bahut lambī ik qatār huuñ maiñ

suno ki ishq-o-mohabbat ka tajdar hun main

mohabbaton ke safine pe ab sawar hun main

gulab khilte hain sine mein mere sheron ke

so shaKH-e-gul ki tarah se hi KHar-dar hun main

na DhunD ab tu mujhe zindagi ki rahon mein

teri hayat ki guzri hui bahaar hun main

ye mere shane pe jo sar hai ek amanat hai

salib-e-arsa-e-hasti pe ek udhaar hun main

KHuda-e-pak safina utar de mera

bahut zamana hua sirf intizar hun main

nahin hai KHud mujhe apni hi zat par koi haq

ye kis ne kah diya hai ahl-e-iKHtiyar hun main

waraq waraq pe kai naqsh the numayan se

unhi nuqush se ubhra sa iztirar hun main

KHushi ke naghme sunaun kahan se main 'danish'

gham-o-alam ki bahut lambi ek qatar hun main