suno to zara ye aaKHir-e-shab nafir-e-dua ajib si hai

suno to zarā ye āḳhir-e-shab nafīr-e-duā ajiib sī hai

zamān-o-makāñ pe chhā.ī huī junūñ kī navā ajiib sī hai

nizām nayā shu.ūr nayā misāl-e-atā ajiib sī hai

savāl pe haath kāTte haiñ talab kī sazā ajiib sī hai

jigar pe har ik sinān-e-nazar jo sahte hue guzar ga.e ham

javāb meñ ab harīfoñ kī shikast-e-anā ajiib sī hai

ye pās-e-bahār ashk piye jo dard baḌhā to sher kahe

batā.eñ kise hamārī tabāhiyoñ kī adā ajiib sī hai

utar ga.e chehre gardishoñ ke laraz ga.ī jaan fāsloñ kī

shikasta diloñ ke qāfile meñ fuġhān-e-darā ajiib sī hai

zamāne ke sard-o-garm se kab milī hai amaañ mujhe 'kausar'

vajūd-e-nafas ko baḳhshī huī karam kī qabā ajiib sī hai

suno to zara ye aaKHir-e-shab nafir-e-dua ajib si hai

zaman-o-makan pe chhai hui junun ki nawa ajib si hai

nizam naya shuur naya misal-e-ata ajib si hai

sawal pe hath kaTte hain talab ki saza ajib si hai

jigar pe har ek sinan-e-nazar jo sahte hue guzar gae hum

jawab mein ab harifon ki shikast-e-ana ajib si hai

ye pas-e-bahaar ashk piye jo dard baDha to sher kahe

bataen kise hamari tabahiyon ki ada ajib si hai

utar gae chehre gardishon ke laraz gai jaan faslon ki

shikasta dilon ke qafile mein fughan-e-dara ajib si hai

zamane ke sard-o-garm se kab mili hai aman mujhe 'kausar'

wajud-e-nafas ko baKHshi hui karam ki qaba ajib si hai