sunsan raston pe teri yaad ne kaha

sunsān rāstoñ pe tirī yaad ne kahā

hālāt kā fareb bhī kitnā hasīn thā

ab ke bhī dard-mand bahāroñ ne jā-ba-jā

phūloñ kī taḳhtiyoñ pe tirā naam likh diyā

raat ek ajnabī kī tarah ghūmtī rahī

din ek falsafī kī tarah sochtā rahā

har tīrgī ne mujh se ujāloñ kī baat kī

har zahr ittifāq se tiryāk bin gayā

chamkā rahī hai ġham ke añdheroñ ko duur tak

kirnoñ kī sīḌhiyoñ se utartī huī sadā

yuuñ dil ke aas paas hai ḳhvāboñ kī raushnī

jaise kisī galī meñ darīcha ho niim vā

'jāmī' jo zindagī se ziyāda 'azīz the

in ko bhī zindagī kī tarah bhūlnā paḌā

sunsan raston pe teri yaad ne kaha

haalat ka fareb bhi kitna hasin tha

ab ke bhi dard-mand bahaaron ne ja-ba-ja

phulon ki taKHtiyon pe tera nam likh diya

raat ek ajnabi ki tarah ghumti rahi

din ek falsafi ki tarah sochta raha

har tirgi ne mujh se ujalon ki baat ki

har zahr ittifaq se tiryak bin gaya

chamka rahi hai gham ke andheron ko dur tak

kirnon ki siDhiyon se utarti hui sada

yun dil ke aas pas hai KHwabon ki raushni

jaise kisi gali mein daricha ho nim wa

'jami' jo zindagi se ziyaada 'aziz the

in ko bhi zindagi ki tarah bhulna paDa