sunta raha hai aur sunega jahan mujhe

suntā rahā hai aur sunegā jahāñ mujhe

yuuñ rakh gayā hai koī sar-e-dāstāñ mujhe

suqrāt kyā masīh kyā zikr-e-husain kyā

maazī sunā rahā hai mirī dāstāñ mujhe

be-nūr mere ba.ad huī bazm-e-kā.ināt

tum to batā rahe the bahut rā.egāñ mujhe

maujoñ se ek umr rahā ma.arka magar

ġharqāb kar ga.iiñ mirī gahrā.iyāñ mujhe

kis ko gumāñ thā vaqt kā Dhalte hī āftāb

aa kar Darā.eñgī mirī parchhā.iyāñ mujhe

'asrār' un ke lab to khuleñ kuchh javāb meñ

nā bhī agar kaheñge to vo hogī haañ mujhe

sunta raha hai aur sunega jahan mujhe

yun rakh gaya hai koi sar-e-dastan mujhe

suqraat kya masih kya zikr-e-husain kya

mazi suna raha hai meri dastan mujhe

be-nur mere baad hui bazm-e-kainat

tum to bata rahe the bahut raegan mujhe

maujon se ek umr raha marka magar

gharqab kar gain meri gahraiyan mujhe

kis ko guman tha waqt ka Dhalte hi aaftab

aa kar Daraengi meri parchhaiyan mujhe

'asrar' un ke lab to khulen kuchh jawab mein

na bhi agar kahenge to wo hogi han mujhe