sunte hain mohabbat dhoka hai dhoka na hua achchha hi hua

sunte haiñ mohabbat dhokā hai dhokā na huā achchhā hī huā

us shāhid-e-rānā se koī va.ada na huā achchhā hī huā

ik jins-e-girāñ hai dil apnā sad-shukr ki apne paas to hai

in zohra-jabīnoñ se yaaro saudā na huā achchhā hī huā

kyā jaane kahāñ Thokar lagtī kyā jaane kahāñ sar jhuk jaatā

kitnī hī pilā.ī us ne magar nashsha na huā achchhā hī huā

ḳhud.dār tabī.at apnī bhī ḳhud.dār tabī.at us kī bhī

us pā-e-nigārīñ par ham se sajda na huā achchhā hī huā

ye baat usī kī sach niklī vo jiit gayā maiñ haar gayā

ik nāseh-e-mushfiq se apnā jhagḌā na huā achchhā hī huā

ehsās ke sho.ale jal uThte dil dukh jaatā jī chhuT jaatā

us mahfil-e-kaif-o-mastī meñ jaanā na huā achchhā hī huā

har ashk hamārā gauhar hai har ashk hamārā shabnam hai

'iqbāl' hameñ in ashkoñ kā ronā na huā achchhā hī huā

sunte hain mohabbat dhoka hai dhoka na hua achchha hi hua

us shahid-e-rana se koi wada na hua achchha hi hua

ek jins-e-giran hai dil apna sad-shukr ki apne pas to hai

in zohra-jabinon se yaro sauda na hua achchha hi hua

kya jaane kahan Thokar lagti kya jaane kahan sar jhuk jata

kitni hi pilai us ne magar nashsha na hua achchha hi hua

KHuddar tabiat apni bhi KHuddar tabiat us ki bhi

us pa-e-nigarin par hum se sajda na hua achchha hi hua

ye baat usi ki sach nikli wo jit gaya main haar gaya

ek naseh-e-mushfiq se apna jhagDa na hua achchha hi hua

ehsas ke shoale jal uThte dil dukh jata ji chhuT jata

us mahfil-e-kaif-o-masti mein jaana na hua achchha hi hua

har ashk hamara gauhar hai har ashk hamara shabnam hai

'iqbaal' hamein in ashkon ka rona na hua achchha hi hua