surKH-ru harf se ye taza-KHayali hui hai

surḳh-rū harf se ye tāza-ḳhayālī huī hai

masnad-e-she'r pe jab merī bahālī huī hai

sar uThā kar ye jo chalte haiñ yahāñ kaj-kulahāñ

tarh is shahr meñ ye merī hī Daalī huī hai

par yahāñ ḳhuub parindoñ ke jalā.e ga.e haiñ

ye fazā shahr meñ yuuñ hī nahīñ kaalī huī hai

us ke kashkol meñ sab shukr kī daulat rakh dī

mujh se duniyā-e-danī jab bhī savālī huī hai

jab se ram karne lage haiñ tirī yādoñ ke ġhazāl

ye mire dil kī zamīñ tab se ġhazālī huī hai

kyā koī dene lagā hai kahīñ sho'loñ ko havā

kis liye shāḳh-e-chaman chiḌiyoñ se ḳhālī huī hai

kaam aatī hai parindoñ kī asīrī ke liye

haq meñ sayyād ke ye be-par-o-bālī huī hai

tū hasīñ hai to koī aur bhī hai tujh se hasīñ

kab koī Dhālī huī shakl misālī huī hai

ḳhalq hote haiñ na.e she'r na.ī aab ke saath

kab zar-e-harf se jholī mirī ḳhālī huī hai

is ġhazal kī ye zamīñ kuchh mujhe mā'lūm nahīñ

hai kisī aur kī yā merī nikālī huī hai

aaj ho ā.eñge us kūcha-e-jānāñ meñ 'anīs'

baat ye ham ne ka.ī roz se Taalī huī hai

surKH-ru harf se ye taza-KHayali hui hai

masnad-e-she'r pe jab meri bahaali hui hai

sar uTha kar ye jo chalte hain yahan kaj-kulahan

tarh is shahr mein ye meri hi Dali hui hai

par yahan KHub parindon ke jalae gae hain

ye faza shahr mein yun hi nahin kali hui hai

us ke kashkol mein sab shukr ki daulat rakh di

mujh se duniya-e-dani jab bhi sawali hui hai

jab se ram karne lage hain teri yaadon ke ghazal

ye mere dil ki zamin tab se ghazali hui hai

kya koi dene laga hai kahin sho'lon ko hawa

kis liye shaKH-e-chaman chiDiyon se KHali hui hai

kaam aati hai parindon ki asiri ke liye

haq mein sayyaad ke ye be-par-o-baali hui hai

tu hasin hai to koi aur bhi hai tujh se hasin

kab koi Dhaali hui shakl misali hui hai

KHalq hote hain nae she'r nai aab ke sath

kab zar-e-harf se jholi meri KHali hui hai

is ghazal ki ye zamin kuchh mujhe ma'lum nahin

hai kisi aur ki ya meri nikali hui hai

aaj ho aaenge us kucha-e-jaanan mein 'anis'

baat ye hum ne kai roz se Tali hui hai