surKH-ru nazron mein hone ka bahana chahun

surḳh-rū nazroñ meñ hone kā bahāna chāhūñ

jo mire paas hai sab tujh pe gañvānā chāhūñ

paas hī chashma ubaltā hai ye mālūm na thā

tishnagī chal ki tirī pyaas bujhānā chāhūñ

lahreñ sāhil se lipaTne ko machal jaatī thiiñ

tujh ko manzar maiñ vahī yaad dilānā chāhūñ

vo ki har lamha mirī ruuh ko sairāb kare

maiñ ki har raat bichhaḌne kā bahāna chāhūñ

tum to zarḳhez zamīñ pā ke bhī māyūs hue

maiñ to sahrāoñ meñ bhī ḳhvāb ugānā chāhūñ

kuuch kar jā.ūñgā pau phaTte hī manzil kī taraf

aaj kī raat musāfir huuñ Thikāna chāhūñ

maiñ ne anjāne jazīroñ kā safar chhoḌ diyā

yaar kī bastī meñ phir lauT ke aanā chāhūñ

zindagī terī pahelī to kaThin hai lekin

tujh ko pā.ūñ to isī ruup meñ paanā chāhūñ

surKH-ru nazron mein hone ka bahana chahun

jo mere pas hai sab tujh pe ganwana chahun

pas hi chashma ubalta hai ye malum na tha

tishnagi chal ki teri pyas bujhana chahun

lahren sahil se lipaTne ko machal jati thin

tujh ko manzar main wahi yaad dilana chahun

wo ki har lamha meri ruh ko sairab kare

main ki har raat bichhaDne ka bahana chahun

tum to zarKHez zamin pa ke bhi mayus hue

main to sahraon mein bhi KHwab ugana chahun

kuch kar jaunga pau phaTte hi manzil ki taraf

aaj ki raat musafir hun Thikana chahun

main ne anjaane jaziron ka safar chhoD diya

yar ki basti mein phir lauT ke aana chahun

zindagi teri paheli to kaThin hai lekin

tujh ko paun to isi rup mein pana chahun