surma jo zeb-e-chashm-e-siyah-fam ho gaya

surma jo zeb-e-chashm-e-siyah-fām ho gayā

fitna savār-e-ablaq-e-ayyām ho gayā

paimāne ke tavāf meñ hai mai-kashoñ kī aañkh

tār-e-nigāh un kā ḳhat-e-jām ho gayā

aaya jo sair ko lab-e-sāhil vo bāda-nosh

dariyā meñ jo habāb uThā jaam ho gayā

ai dil firāq-e-yār meñ marnā hai zindagī

jāñbāz āshiqoñ meñ tirā naam ho gayā

TukḌe dil-o-jigar ke uḌāne se fā.eda

ai teġh-e-nāz ab to mirā kaam ho gayā

zulfoñ kī yaad meñ nazar aaya jo rū-e-yār

thā kufr kā ḳhayāl par islām ho gayā

us zulf ke ḳhayāl ne afsurda-dil kiyā

ThanDā charāġh-e-umr sar-e-shām ho gayā

milte nahīñ vo ham se ab itne za.iif haiñ

labrez umr-e-ḳhizr kā bhī jaam ho gayā

tāqat badan meñ aa ga.ī chehra bahāl hai

tashrīf laa.e aap ki ārām ho gayā

tū shaam ko jo aaya Tahalne ke vāste

sartāj-e-koh-e-tūr tirā baam ho gayā

surme se uḌ chalā tirī āñkhoñ kā husn aur

kyā tez-gām ablaq-e-ayyām ho gayā

ham ibtidā-e-ishq hī meñ ho ga.e tamām

āġhāz jis ko samjhe the anjām ho gayā

ḳhil.at diyā jo zaḳhmoñ kā qātil kī teġh ne

nām-āvarī kā ḳhuub sar-anjām ho gayā

kahtā hai taan se tū hameñ banda-e-ḳhudā

itnā mizāj o but-e-ḳhud-kām ho gayā

qāsid ne be-dhaḌak jo sunāyā javāb-e-shauq

paiġhām-e-yār maut kā paiġhām ho gayā

phailā ye sehr-e-chashm-e-fusūñ-sāz yaar kā

paTna hamārā ḳhitta-e-āshām ho gayā

qismat meñ puḳhtagī jo na roz-e-azal se thī

jo phal hameñ milā samar-e-ḳhām ho gayā

us rashk-e-gul ne dekhte hī said kar liyā

tār-e-nigāh-e-nāz mujhe daam ho gayā

ab zikr bhī hamārā tumheñ nāgavār hai

aisā zalīl āshiq-e-nākām ho gayā

hāsil huī hai ye barakat na.at-e-pāk se

'akbar' tirā bhī shāh-e-suḳhan naam ho gayā

surma jo zeb-e-chashm-e-siyah-fam ho gaya

fitna sawar-e-ablaq-e-ayyam ho gaya

paimane ke tawaf mein hai mai-kashon ki aankh

tar-e-nigah un ka KHat-e-jam ho gaya

aaya jo sair ko lab-e-sahil wo baada-nosh

dariya mein jo habab uTha jam ho gaya

ai dil firaq-e-yar mein marna hai zindagi

jaanbaz aashiqon mein tera nam ho gaya

TukDe dil-o-jigar ke uDane se faeda

ai tegh-e-naz ab to mera kaam ho gaya

zulfon ki yaad mein nazar aaya jo ru-e-yar

tha kufr ka KHayal par islam ho gaya

us zulf ke KHayal ne afsurda-dil kiya

ThanDa charagh-e-umr sar-e-sham ho gaya

milte nahin wo hum se ab itne zaif hain

labrez umr-e-KHizr ka bhi jam ho gaya

taqat badan mein aa gai chehra bahaal hai

tashrif lae aap ki aaram ho gaya

tu sham ko jo aaya Tahalne ke waste

sartaj-e-koh-e-tur tera baam ho gaya

surme se uD chala teri aankhon ka husn aur

kya tez-gam ablaq-e-ayyam ho gaya

hum ibtida-e-ishq hi mein ho gae tamam

aaghaz jis ko samjhe the anjam ho gaya

KHilat diya jo zaKHmon ka qatil ki tegh ne

nam-awari ka KHub sar-anjam ho gaya

kahta hai tan se tu hamein banda-e-KHuda

itna mizaj o but-e-KHud-kaam ho gaya

qasid ne be-dhaDak jo sunaya jawab-e-shauq

paigham-e-yar maut ka paigham ho gaya

phaila ye sehr-e-chashm-e-fusun-saz yar ka

paTna hamara KHitta-e-asham ho gaya

qismat mein puKHtagi jo na roz-e-azal se thi

jo phal hamein mila samar-e-KHam ho gaya

us rashk-e-gul ne dekhte hi said kar liya

tar-e-nigah-e-naz mujhe dam ho gaya

ab zikr bhi hamara tumhein nagawar hai

aisa zalil aashiq-e-nakaam ho gaya

hasil hui hai ye barakat nat-e-pak se

'akbar' tera bhi shah-e-suKHan nam ho gaya