su-e-shahr aae uDate parcham-e-sahra ko hum

sū-e-shahr aa.e uḌāte parcham-e-sahrā ko ham

ai junūñ ab ke ulaT ke rakh hī deñ duniyā ko ham

thā kahīñ maazī meñ to ai haal ab aage terā kaam

le to aa.e terī chaukhaT tak tire fardā ko ham

kitne daanā haiñ lagā kar aag saare shahr ko

ek gangā le chale jaltī huī lanka ko ham

muztarib haiñ saare sannāTe ki āvāzeñ baneñ

rahbaro daabe haiñ ik patthar tale sahrā ko ham

ḳhaak kā zarra guhar ke mol thā bāzār meñ

jau ke daane ke liye rote haiñ an-dātā ko ham

pyaas kah kah kar pukāreñ biich dariyā meñ khaḌe

paanī paanī kah ke māñgeñ ret se dariyā ko ham

dhuup agar hotī to tan Dhaknā kuchh āsāñ thā 'shahāb'

raushnī se chhīn lete parda-e-sāyā ko ham

su-e-shahr aae uDate parcham-e-sahra ko hum

ai junun ab ke ulaT ke rakh hi den duniya ko hum

tha kahin mazi mein to ai haal ab aage tera kaam

le to aae teri chaukhaT tak tere farda ko hum

kitne dana hain laga kar aag sare shahr ko

ek ganga le chale jalti hui lanka ko hum

muztarib hain sare sannaTe ki aawazen banen

rahbaro dabe hain ek patthar tale sahra ko hum

KHak ka zarra guhar ke mol tha bazar mein

jau ke dane ke liye rote hain an-data ko hum

pyas kah kah kar pukaren bich dariya mein khaDe

pani pani kah ke mangen ret se dariya ko hum

dhup agar hoti to tan Dhakna kuchh aasan tha 'shahab'

raushni se chhin lete parda-e-saya ko hum