sud-o-ziyan ki fikr se begana ban ke ji

sūd-o-ziyāñ kī fikr se begāna ban ke jī

jiine kī aarzū hai to dīvāna ban ke jī

phir aam kar rumūz-e-tajallī ba-rang-e-nau

tū ai kalīm tuur kā afsāna ban ke jī

hai justujū meñ terī tajallī kī har nazar

tū sham.a-e-rū-e-dost kā parvāna ban ke jī

ai fāriġh-e-rusūm-oquyūd-e-ta.ayyunāt

jī aur harīf-e-ka.aba-o-but-ḳhāna ban ke jī

tār-e-nafas ke saaz pe raqsāñ hai zindagī

muhtāj-e-iltifāt-e-masīhā na ban ke jī

marhūn-e-kaifiyāt-e-mai-e-rang-o-bū na ho

begāna-vār sūrat-e-paimāna ban ke jī

koī maqām-e-shauq shikāyat na kar sake

ḳhud-rafta ban ke jī kabhī farzāna ban ke jī

'zamzam' tarīq-e-ishq meñ tajdīd-e-shauq kar

tafsīr-e-ka.aba sharh-e-sanam-ḳhāna ban ke jī

sud-o-ziyan ki fikr se begana ban ke ji

jine ki aarzu hai to diwana ban ke ji

phir aam kar rumuz-e-tajalli ba-rang-e-nau

tu ai kalim tur ka afsana ban ke ji

hai justuju mein teri tajalli ki har nazar

tu shama-e-ru-e-dost ka parwana ban ke ji

ai farigh-e-rusum-oquyud-e-tayyunat

ji aur harif-e-kaba-o-but-KHana ban ke ji

tar-e-nafas ke saz pe raqsan hai zindagi

muhtaj-e-iltifat-e-masiha na ban ke ji

marhun-e-kaifiyat-e-mai-e-rang-o-bu na ho

begana-war surat-e-paimana ban ke ji

koi maqam-e-shauq shikayat na kar sake

KHud-rafta ban ke ji kabhi farzana ban ke ji

'zamzam' tariq-e-ishq mein tajdid-e-shauq kar

tafsir-e-kaba sharh-e-sanam-KHana ban ke ji