suraj bhi sar pe ho to use saeban kahen

sūraj bhī sar pe ho to use sā.ebāñ kaheñ

ab dasht hī ko aao ham apnā makāñ kaheñ

hoñ ek āsmān-o-zamīñ jis jagah vahāñ

samjheñ kise zamīn kise āsmāñ kaheñ

rindoñ ko mai-kade kī siyāsat se kyā ġharaz

jo bhī pilā.e ham use pīr-e-muġhāñ kaheñ

chup baiTh kar bhī dosto kaTtī kahāñ hai raat

is ḳhāmoshī meñ kyoñ na koī dāstāñ kaheñ

jab vo har ek shai meñ hai jalva-numā to phir

kyā baat hai ki log use be-nishāñ kaheñ

khultā nahīñ ki kaun hamārā harīf hai

aatā nahīñ samajh meñ kise mehrbāñ kaheñ

zarra bhī hai liye hue sahrā kī vus'ateñ

qatra bhī hai vo bahr jise be-karāñ kaheñ

be-sāḳhta nikal to paḌī hai sadā-e-dil

ab log is ko giit kaheñ yā fuġhāñ kaheñ

'ḳhāvar' jab is kī god ke paale hue haiñ ham

phir kyoñ na apne des ko ham apnī maañ kaheñ

suraj bhi sar pe ho to use saeban kahen

ab dasht hi ko aao hum apna makan kahen

hon ek aasman-o-zamin jis jagah wahan

samjhen kise zamin kise aasman kahen

rindon ko mai-kade ki siyasat se kya gharaz

jo bhi pilae hum use pir-e-mughan kahen

chup baiTh kar bhi dosto kaTti kahan hai raat

is KHamoshi mein kyon na koi dastan kahen

jab wo har ek shai mein hai jalwa-numa to phir

kya baat hai ki log use be-nishan kahen

khulta nahin ki kaun hamara harif hai

aata nahin samajh mein kise mehrban kahen

zarra bhi hai liye hue sahra ki wus'aten

qatra bhi hai wo bahr jise be-karan kahen

be-saKHta nikal to paDi hai sada-e-dil

ab log is ko git kahen ya fughan kahen

'KHawar' jab is ki god ke pale hue hain hum

phir kyon na apne des ko hum apni man kahen