suraj ki tapti dhup ne mara hai in dinon

sūraj kī taptī dhuup ne maarā hai in dinoñ

peḌoñ kī chhāñv kā hī sahārā hai in dinoñ

ham ko bhī dil ke dard ne maarā hai in dinoñ

dard-e-jigar ġhazal meñ utārā hai in dinoñ

ehsās barf barf haiñ dil kī zamīn par

yādoñ kī dhuup kā hī sahārā hai in dinoñ

sūkhe badan kī ḳhaak pe ġham kī phuvār thī

ye hī sabab hai jism meñ gaarā hai in dinoñ

ye ashk ab to pyaas bujhāne lage mirī

ye ābshār apnā sahārā hai in dinoñ

ġham ke thapeḌe biich samundar meñ le ga.e

ḳhushiyoñ kā mujh se duur kināra hai in dinoñ

'sīmā' kī dhaḌkaneñ bhī tumhārī kanīz haiñ

dil par hamāre raaj tumhārā hai in dinoñ

suraj ki tapti dhup ne mara hai in dinon

peDon ki chhanw ka hi sahaara hai in dinon

hum ko bhi dil ke dard ne mara hai in dinon

dard-e-jigar ghazal mein utara hai in dinon

ehsas barf barf hain dil ki zamin par

yaadon ki dhup ka hi sahaara hai in dinon

sukhe badan ki KHak pe gham ki phuwar thi

ye hi sabab hai jism mein gara hai in dinon

ye ashk ab to pyas bujhane lage meri

ye aabshaar apna sahaara hai in dinon

gham ke thapeDe bich samundar mein le gae

KHushiyon ka mujh se dur kinara hai in dinon

'sima' ki dhaDkanen bhi tumhaari kaniz hain

dil par hamare raj tumhaara hai in dinon