suraj ki tarah Dub chuke aur ubhar chuke

sūraj kī tarah Duub chuke aur ubhar chuke

is zindagī meñ ham to ka.ī baar mar chuke

ḳhushiyoñ kā ab hujūm sahī mere aas paas

siine meñ ġhurbatoñ ke to nashtar utar chuke

ab aur log aa.eñ sañvāreñ salīb-o-dār

ham to salīb-o-dār kī had se guzar chuke

dildāriyāñ fuzūl haiñ ai chāra-sāz-e-ġham

zaḳhmoñ kā ab ilaaj na kar zaḳhm bhar chuke

kyā zikr dostoñ kā rafīqoñ kā in dinoñ

ham apne saa.e se bhī ka.ī baar Dar chuke

ab apnī justujū se milegā bhī kyā ki ham

ruk ruk ke saañs ban ke fazā meñ bikhar chuke

merī kahāniyoñ meñ nahīñ jin kā zikr tak

tūfān aise saikḌoñ sar se guzar chuke

'shāhid' ġham-e-zamāna kā ab tak shikār hai

gesū tumhāre kab ke bikhar kar sañvar chuke

suraj ki tarah Dub chuke aur ubhar chuke

is zindagi mein hum to kai bar mar chuke

KHushiyon ka ab hujum sahi mere aas pas

sine mein ghurbaton ke to nashtar utar chuke

ab aur log aaen sanwaren salib-o-dar

hum to salib-o-dar ki had se guzar chuke

dildariyan fuzul hain ai chaara-saz-e-gham

zaKHmon ka ab ilaj na kar zaKHm bhar chuke

kya zikr doston ka rafiqon ka in dinon

hum apne sae se bhi kai bar Dar chuke

ab apni justuju se milega bhi kya ki hum

ruk ruk ke sans ban ke faza mein bikhar chuke

meri kahaniyon mein nahin jin ka zikr tak

tufan aise saikDon sar se guzar chuke

'shahid' gham-e-zamana ka ab tak shikar hai

gesu tumhaare kab ke bikhar kar sanwar chuke