suraj kiran ke sine mein jaise saja hua

sūraj kiran ke siine meñ jaise sajā huā

aise hī naam aap kā dil par likhā huā

lahreñ ḳhushī kī uThtī raheñgī kabhī kabhī

gar dil meñ hai sukūñ kā samundar basā huā

toḌā use to ek qayāmat bapā huī

zarre meñ āftāb thā jaise chhupā huā

bas ik tirī nigāh nigāhoñ se kyā milī

sūkhā huā thā naḳhl-e-tamannā harā huā

har aql hai asīr-e-aqīdat banī huī

aur dil to hai sarāpā aqīda banā huā

ai bādbān-e-ishq-e-butāñ le chalā kahāñ

TuuTī ye dil kī naav hai dariyā rukā huā

kahne ko umr bhar thī guzārī jahān meñ

lagtā hai do ghaḌī meñ fasāna havā huā

māñge ke chañd roz the lo ḳhatm ho ga.e

yuuñ zindagī kā qarz 'hidāyat' adā huā

suraj kiran ke sine mein jaise saja hua

aise hi nam aap ka dil par likha hua

lahren KHushi ki uThti rahengi kabhi kabhi

gar dil mein hai sukun ka samundar basa hua

toDa use to ek qayamat bapa hui

zarre mein aaftab tha jaise chhupa hua

bas ek teri nigah nigahon se kya mili

sukha hua tha naKHl-e-tamanna hara hua

har aql hai asir-e-aqidat bani hui

aur dil to hai sarapa aqida bana hua

ai baadban-e-ishq-e-butan le chala kahan

TuTi ye dil ki naw hai dariya ruka hua

kahne ko umr bhar thi guzari jahan mein

lagta hai do ghaDi mein fasana hawa hua

mange ke chand roz the lo KHatm ho gae

yun zindagi ka qarz 'hidayat' ada hua