surat-e-gardish-e-haalat badalti hi nahin

sūrat-e-gardish-e-hālāt badaltī hī nahīñ

apnī mahrūmī-e-dil hai ki jo Taltī hī nahīñ

dil kā ye haal ki ġham kā na ḳhushī kā ehsās

aur tabī'at kā ye 'ālam ki sañbhaltī hī nahīñ

ik tamanna hai ki ho jaise ragoñ meñ paivast

ek hasrat hai ki jo dil se nikaltī hī nahīñ

ab mirā saath na chhoḌe shab-e-hijrāñ se kaho

kitnī mānūs hai ye raat ki Dhaltī hī nahīñ

aa batā.ūñ tujhe pahchān ḳhulūs-e-dil kī

ye vo mai hai ki jo āñkhoñ se ubaltī hī nahīñ

‘izzat-e-nafs na khonā ye vo nāzuk shai hai

gir ke nazroñ se ye kam-baḳht sañbhaltī hī nahīñ

'bazm' ab us kī vafā se bhī na bahle shāyad

merī āzurda tabī'at ki bahaltī hī nahīñ

surat-e-gardish-e-haalat badalti hi nahin

apni mahrumi-e-dil hai ki jo Talti hi nahin

dil ka ye haal ki gham ka na KHushi ka ehsas

aur tabi'at ka ye 'alam ki sanbhalti hi nahin

ek tamanna hai ki ho jaise ragon mein paiwast

ek hasrat hai ki jo dil se nikalti hi nahin

ab mera sath na chhoDe shab-e-hijran se kaho

kitni manus hai ye raat ki Dhalti hi nahin

aa bataun tujhe pahchan KHulus-e-dil ki

ye wo mai hai ki jo aankhon se ubalti hi nahin

‘izzat-e-nafs na khona ye wo nazuk shai hai

gir ke nazron se ye kam-baKHt sanbhalti hi nahin

'bazm' ab us ki wafa se bhi na bahle shayad

meri aazurda tabi'at ki bahalti hi nahin